БМТ бош котиби Антониу Гутерриш Германия собиқ канцлери Ангела Меркелга бутун инсониятга фойда келтирадиган глобал жамоачилик фаровонлиги бўйича юқори даражадаги маслаҳат органига раислик қилишни таклиф этди. Бу ҳақда Spiegel нашри БМТдаги манбаларига таяниб, хабар берди.
Маълум қилинишича, Гутерриш Меркелга таклифни мактуб кўринишида юборган ва ҳозирда жавоб келмаган. Аммо ташкилотнинг ўзидагилар собиқ канцлер иш борасидаги таклифни қабул қилишига шубҳа билдирмоқда.
БМТ глобал жамоачилик фаровонлиги деганда, хусусан, глобал соғлиқни сақлаш, илм-фан, тинчликни таъминлаш, табиатни муҳофаза қилиш, жаҳон иқтисодиётини тушунади.
Нашр маълумотларига кўра, Меркель ушбу таклифга рад жавобини бергудек бўлса, унга БМТнинг иқлим бўйича раҳбари лавозими таклиф этиши мумкин. Чунки БМТнинг иқлим ўзгариши бўйича доиравий конвенцияси ижрочи котиби Патрисия Эспинозанинг ваколатлари 2022 йилнинг ёзида тугайди.
Аввалроқ Меркель истеъфога чиққанидан кейин маълум вақт дам олиши, кейин хаёлига келган иш билан шуғулланиши ҳақида гапирганди. Шу билан бирга, у сиёсат билан бошқа шуғулланмаслигини маълум қилганди.
Мавзуга доир: Германия Ангела Меркелни канцлер лавозимидан кузатди. Унинг шарафига тантанали маросим бўлиб ўтди
27 сентябрь куни бўлиб ўтган Германиядаги парламент сайловларида амалдаги молия вазири Олаф Шольц раҳбарлигидаги Социал-демократик партия (ГСДП) ғалаба қозонди. Унга сайловчиларнинг 25,7 фоизи овоз берди, ушбу натижага мувофиқ у янги Бундестагда 206 та ўринга эга бўлади. 26 октябрь куни Германия президенти Франк-Валтер Штайнмаер Меркелга ҳукумат раҳбари сифатидаги муддати расман тугагани тўғрисидаги мактубни топширди.
Изоҳ (0)