Бирлашган Араб Амирликларининг (БАА) пойтахти Абу-Дабига фақат коронавирусга қарши вакцинанинг бустер дозаси билан эмланган одамларнинг киришига рухсат берилади. Бу ҳақда Arab News хабар берди.
Пойтахт ҳукуматининг соғлиқни сақлаш дастурига кўра, шаҳарга ташриф буюрувчилар бустер доза билан эмланганини кўрсатувчи «яшил паспорт»ни тақдим этиши шарт. Шу билан бирга, вакцинанинг иккинчи дозасидан кейин камида олти ой ўтса ҳам бустер олмаганлар эндиликда тўлиқ эмланган деб ҳисобланмайди.
Бундан ташқари, Абу-Дабига кириш учун охирги икки ҳафта ичида коронавирусга топширилган тестнинг манфий натижаси керак. Абу-Даби расмийлари аҳолидан жамоат жойлари ёки ҳукумат биноларига киришдан олдин «яшил паспорт»ини кўрсатишни талаб қилмоқда.
Бирлашган Араб Амирликлари мамлакатга кириш ниятида бўлган Ўзбекистон ва Тожикистон фуқароларига чекловлар қўйганди. Энди ушбу икки мамлакат фуқаролари БААга жўнаб кетишдан 48 соат аввал олинган ПЗР тестнинг манфий натижасини тақим этиши керак. Бундан ташқари, Дубай ва Шаржага етиб келгандан сўнг, аэропортда яна ПЗР тестидан ўтади.
Эслатиб ўтамиз, БАА дунёда аҳолини эмлаш бўйича энг юқори кўрсаткичларга эга давлат ҳисобланади. Соғлиқни сақлаш идоралари маълумотларига кўра, мамлакатда аҳолининг 90 фоиздан ортиғи тўлиқ эмланган.
Изоҳ (0)