Россия Қозоғистондан тинчликпарвар кучларини олиб чиқишни якунлади

Бортида Коллектив Хавфсизлик Шартномаси Ташкилотининг (КХШТ) тинчликпарвар кучлари бўлган Россиянинг сўнгги тўртта ҳарбий транспорт самолёти Қозоғистон пойтахтидан ҳавога кўтарилди. Бу ҳақда Россия Мудофаа вазирлигига таяниб, Meduza хабар берди.

Ушбу самолётлар Россияга қайтмоқда. Улардаги тинчликпарвар контингент қўмондонлигига жумладан Россия генерал-полковниги Андрей Сердюков раҳбарлик қилмоқда.

«КХШТ Коллектив хавфсизлик кенгаши қарорига мувофиқ Қозоғистон ҳудудида ўтказилган тинчликпарвар операция якунланди», — деди Сердюков. У тинчликпарвар кучлари топширилган вазифани муваффақиятли уддалаганини қўшимча қилди.

Қозоғистонда 2 январь куни газ нархи кескин ошиши сабабли оммавий норозилик намойишлари бошланиб, бир неча кундан сўнг улар тартибсизликларга айланди. 4 ва 5 январь кунлари Олмаотада намойишчиларнинг хавфсизлик ходимлари билан тўқнашуви кузатилди. Қозоғистондаги тартибсизликлар фонида мамлакат бўйлаб фавқулодда ҳолат эълон қилинди. Мамлакат президенти Қосим-Жўмарт Тўқаев КХШТдан тинчликпарвар кучларини юборишни сўради. 6 январдан Қозоғистонга КХШТ ҳарбийларини жўнатиш бошланди.

Маълум қилинишича, тинчликпарвар кучлар ва техникаларнинг барчаси уч кун ичида Қозоғистонга етказилган. Россия ҳарбий транспорт самолётлари нафақат Россиядан, балки миссияда иштирок этаётган бошқа мамлакатлардан (КХШТ таркибига Россия, Беларусь, Арманистон, Тожикистон ва Қирғизистон киради) ҳам ҳарбийларни Қозоғистонга ташишда ва республикадан олиб чиқишда зарур парвозларни амалга оширди.

Тўқаевнинг сўровига биноан тинчликпарвар контингентнинг сони 2500 кишидан ошмаслиги керак эди. КХШТ бош котиби Станислав Заснинг баёнотига кўра, ҳарбийларни Қозоғистонга олиб кириш учун 108 та рейс амалга оширилган, унда Россиянинг 70 дан ортиқ Ил-76 ва бешта Ан-124 самолётлари иштирок этган.

Тинчликпарвар кучлар Қозоғистондаги муҳим объектларни ҳимояга олган. Уларни жанговар ҳаракатларга сафарбар қилиш режалаштирилмаган.

11 январь куни Тўқаев мамлакатдаги вазият барқарорлашгани, икки кундан кейин тинчликпарвар кучларни олиб чиқиш бошланиши мумкинлигини маълум қилди. 13 январь куни КХШТга аъзо давлатларнинг мудофаа вазирлари тегишли қарорни имзолади.