18 январь куни Нью-Йоркнинг Бронкс туманидаги кўп қаватли уйлар жойлашган даҳада портлаш содир бўлди. Кўнгилсиз ҳодиса оқибатида бир аёл ҳалок бўлган яна тўққиз киши жароҳат олган, деб хабар беради Reuters.
Қутқарувчиларнинг маълум қилишича, фожиага газ портлаши сабаб бўлган ва бу бинода ёнғинни келтириб чиқарган.
Таъкидланишича, ҳалок бўлган 77 ёшли аёлдан ташқари, унинг 82 ёшли опаси ҳам жиддий жароҳат олган. Ҳозирда у шифохонада оғир аҳволда. Шунингдек, портлаш оқибатида жиддий жароҳат олган қўшни уйдаги 68 ёшли аёл ҳам шифохонага ётқизилган.
Бундан ташқари, жабрланганлар орасида беш нафар полициячи ҳам бор — улар фуқароларга ёрдам бериш мақсадида ёнаётган бино ичига кирган. Ҳуқуқ-тартибот идорасининг ходимлари тутундан заҳарланган, ҳозирда уларнинг аҳволи барқарор экани айтилмоқда.
Содир бўлган воқеа жойига 200 га яқин ўт ўчирувчи ва тез ёрдам ходимлари жалб этилган. Фалокат сабаблари аниқлангунга қадар даҳадаги газ таъминоти ўчириб қўйилган.
Эслатиб ўтамиз, 10 январь куни Бронксдаги кўп қаватли турар жой биносида содир бўлган ёнғин оқибатида 19 киши ҳалок бўлганди. The New York Times маълумотларига кўра, ёнғин қурбонлари орасида тўққиз нафар бола ҳам бўлган. Нью-Йорк ҳукуматининг маълум қилишича, 60 дан ортиқ одам жабрланган бўлиб, уларнинг бештасида Бронкс шифохонасига ётқизилган эди.
Изоҳ (0)