Қозоғистон Миллий хавфсизлик қўмитаси мамлакатдаги тартибсизликларда иштирок этишга гумонланган Ўзбекистон фуқаросини қўлга олингани тўғрисида хабар берди. Ўзбекистон Ташқи ишлар вазирлиги расмий вакили мазкур ҳолатга муносабат билдириб, қўлга олинган шахс ўзбекистонлик эмаслигини маълум қилди.
Хабарда таъкидланишича, Қозоғистонда содир бўлган тартибсизликларда иштирок этишда гумон қилинаётган Ўзбекистон фуқаросининг 2022 йил 17 январь куни Туркистон вилояти «Жибек жоли» ўтиш пунктида қўлга олинган.
Ўзбекистоннинг Олмаота шаҳридаги Бош консулхонаси томонидан Қозоғистон Миллий хавфсизлик қўмитаси матбуот хизматидан олинган маълумотга кўра, қўлга олинган шахс Ўзбекистон фуқароси эмас.
Эслатиб ўтамиз, Ўзбекистон Ташқи ишлар вазирлиги аввалроқ қўшни Қозоғистондаги вазиятни мунтазам равишда кузатиб бораётганини маълум қилганди. Ўзбекистоннинг Қозоғистондаги дипломатик ваколатхоналари – Нур-Султондаги элчихонаси, Олмаота ва Ақтаудаги бош консулликларида тезкор штаблар ташкил этилган.
Қозоғистондаги вазият 2 январь куни Жанаўзен шаҳрида (Манғистов вилоятидаги шаҳар) суюлтирилган газ нархининг икки баравар ошишига қарши митинглар бошланганидан сўнг кескинлашди. Чиқишлар иқтисодий ва сиёсий талаблар билан бутун мамлакат бўйлаб оммавий норозилик намойишларига айланиб кетди. 4 ва 5 январь кунлари Олмаотада намойишчиларнинг хавфсизлик ходимлари билан тўқнашуви кузатилди. Мамлакат бўйлаб интернет узиб қўйилган. Мобил алоқа ҳам деярли ишламаяпти. Қозоғистон президенти Қосим-Жўмарт Тўқаев мамлакатдаги оммавий тартибсизликлар пайтида ҳалок бўлганлар ва жароҳатланганлар борлигини айтган. Tengrinews Қозоғистон Ички ишлар вазирлиги маълумотларига таяниб, тартибсизликлар чоғида 8 нафар полициячи ва Миллий гвардия аскари ҳалок бўлгани, яна 317 киши жароҳатлангани ҳақида хабар берган.
6 январда Коллектив Хавфсизлик Шартномаси Ташкилоти (КХШТ) тинчликпарвар кучлари Қозоғистонга жўнатди. 7 январда Тўқаев Қозоғистонда конституциявий тартиб тикланганини эълон қилди ва мамлакат бўйлаб террорчилик хавфининг юқори даражаси жорий этилди. 11 январда Қозоғистон президенти Қосим-Жўмарт Тўқаев парламент мажлисида Коллектив хавфсизлик шартномаси ташкилоти (КХШТ) тинчликпарвар кучларининг Қозоғистондаги асосий миссияси якунланганини маълум қилган.
Изоҳ (0)