Халқ таълими вазирлиги мактабларда география фанининг дарс соатларида ўзгаришлар бўлаётгани юзасидан ижтимоий тармоқларда тарқалган эътирозларга муносабат билдирди.
Маълум қилинишича, Миллий ўқув дастурига кўра, 2022/2023-ўқув йилидан бошлаб, 1–6-синфларда ягона табиий фанлар (Science) фани жорий қилиниши белгиланган. Янги фан география, биология, физика, кимё ҳамда астрономия фанлари бўйича ўқувчиларнинг дастлабки кўникмаларини шакллантиришга қаратилган.
Эндиликда бу фанларга оид билим ва кўникмалар ўқувчиларда 1-синфдан бошлаб шакллантирилади. Миллий ўқув дастури доирасида ўқувчиларда табиий фанлар орқали шаклланиши лозим бўлган билим ва кўникмалар ҳар бир синф кесимида белгиланган.
«Ўқувчилар бошланғич синфларда етарли кўникма ва малакага эга бўлишлари учун халқаро тажрибадан келиб чиқиб, янги фанга ажратилган дарс соатларини бошланғич синфларда кўпайтиришга эҳтиёж туғилди. Шу муносабат билан, 6-синфда ҳар бири ҳафталик 2 соатдан ўтиладиган (жами 6 соатлик) география, биология ва физика фанлари ўрнига ягона, ҳафтасига 3 соатлик табиий фанлар киритилди», — дейилади муносабатда.
Ўз навбатида, қолган ҳафталик 3 соат табиий фанлар доирасида 2-, 3-, 4-синфларга ўтказилган. Яъни бу синфларга ҳафтасига 1 соатдан, жами 3 соат қўшиб берилган.
Таъкидланишича, мактабда география фанидан берилиши зарур бўлган билим ҳажми ва унга умумий режада ажратилган соатлар ҳажми қисқаргани йўқ.
«Шу нуқтаи назардан, ижтимоий тармоқларда география фани йўқолиш хавфи остида деган хулосалар асоссиз», — дея қайд этилади муносабатда.
Шунингдек, Халқ таълими вазирлиги бу борадаги жаҳон тажрибаси ва янги фан киритилиши ўқувчиларга қандай имконият яратиши тўғрисидаги маълумотлар билан бўлишган.
Жаҳон тажрибасида қандай?
Табиий фанлар жаҳондаги аксарият ривожланган давлатларда ўқитилади. Хусусан, Буюк Британия тажрибаси ўрганилганида, табиий фанлар 1–6-синфларда интеграция қилинган ҳолда, ягона фан сифатида ўқитилади.
Табиий фанларнинг қуйи синфларда қўшиб ўқитилиши ўқувчига оламни бир бутун тасаввур қилиш, фанларга оид мавзулар кесимида лойиҳа ишларини амалга ошириб, тадқиқотчилик кўникмаларини ривожлантириш, ўқувчиларнинг фаоллигини ошириш, танқидий фикрлаш қобилиятларини яхшилаш, уларни ижодкорликка йўналтиришга хизмат қилади.
Миллий ўқув дастури доирасида таълим мазмунида амалга оширилаётган бу каби ўзгаришлар иқтисодиёт соҳаларига халқаро андозалар асосида меҳнат бозорида эҳтиёж юқори бўлган кўникмаларга эга кадрларни тайёрлаши билан ўқувчилар учун манфаатлидир.
Янги фан киритилиши ўқитувчиларга қандай имконият яратади?
Миллий ўқув дастурида айнан география фани ҳафталик 8 соат дарс ўтилиши белгиланган. Шу ўринда алоҳида қайд этиш лозимки, география фани ўқитувчиларида табиий фанлар йўналиши бўйича қисқа муддатли қайта тайёрлов курсини муваффақиятли тамомлаган тақдирда, 11 соат дарс бериш имконияти пайдо бўлади (натижада, амалдаги ҳафталик 10 соат ўрнига, 11 соат беришлари мумкин).
Шу билан бирга, вазирлик дастурни халқаро талаблар асосида замонавийлаштириш бўйича ўз олдига қўйилган вазифаларни инобатга олган ҳолда, ўқувчиларда иқтисодий билимларни янада ошириш мақсадида қўшимча соат ажратиш бўйича имкониятларни ўрганмоқда.
Мазкур йўналишда қўшимча дарс жорий қилинса, бу ҳам география ўқитувчилари учун қўшимча имконият бўлади.
Изоҳ (0)