Араб коалициясининг Яман пойтахти Сано шаҳрига амалга оширган зарбалари оқибатида камида 23 киши ҳалок бўлди. Ҳалок бўлганлар орасида аёллар ва болалар ҳам бор. Шунингдек, бешта турар жой биноси вайрон бўлган, деб хабар беради «ТАСС».
Маълум қилинишича, зарбалар «Ансар Аллоҳ» хусийлар ҳаракати томонидан БАА ҳудудига берилган зарбаларга жавоб тарзида амалга оширилган. Коалиция хабарида таъкидланишича, зарбалар «террорчиларнинг етакчиларига» қаратилган ва «ҳарбий зарурат» билан қўзғатилган.
«Коалициянинг ҳарбий-ҳаво кучлари Сано узра кун-у тун операцияларни ўтказмоқда. Тинч аҳолини ўз хавфсизликлари учун ҳарбий лагерлар ва хусийлар йиғинларидан узоқроқда бўлишга чақирамиз», — дейилади коалиция баёнотида.
Таъкидланишича, Ф-15 қирувчи-бомбардимони БААга нисбатан зарбаларни беришда фойдаланилган иккита баллистик ракета учириш мосламасини йўқ қилган. Шунингдек, маълум қилинишича, шаҳар ғарбидаги «Ансар-Аллоҳ» хусийлари томонидан ушлаб турилган Эл-Либи даҳасига ҳам ҳаводан ҳужуми амалга оширилган. Бешта уй вайрон бўлгани, яна ўнлаб биноларга зарар етгани айтилмоқда. Вайроналар остида одамлар қолиб кетган бўлиши мумкин.
Аввалроқ Яманнинг Мариб шаҳрига амалга оширилган ракета зарбалари оқибатида 29 киши ҳалок бўлгани тўғрисида хабар берилганди.
Ямандаги можаролар 2014 йилдан бери давом этмоқда. Ҳарбий зиддиятлар 2015 йилнинг март ойида Саудия Арабистони бошчилигидаги коалиция кучларининг республика президенти Мансур Ҳодий тарафига келиб қўшилганидан сўнг кучайди. Уларга Эрон томонидан қўллаб-қувватланаётган «Ансар Аллоҳ» ҳаракати таркибига кирувчи яманлик исёнчилар қаршилик кўрсатмоқда.
Эслатиб ўтамиз, 2020 йилнинг июлида Яман марказий ҳукумати ва Жанубий ўтиш даври кенгаши сепаратистлари янги ҳукумат тузишга рози бўлганди. Шу орқали Яман Саудия Арабистонининг можарони тартибга солиш ва ўт очишни тўхтатиш режими борасидаги ташаббусини қўллаб-қувватлаган. Декабрь ўрталарида бош вазир Маин Абдул Малик бошчилигида ҳукумат шакллантирилган. 26 декабрь куни янги ҳукумат президент Мансур Ҳодийга қасамёд келтирган.
Жанубий ўтиш даври кенгаши 2017 йилда тузилган. Бир қанча муддат улар Яманнинг тан олинган ҳукумати билан биргаликда «Ансар Аллоҳ» хусийлар ҳаракатига қарши курашиб келган, бироқ кейинчалик ўрада можаро юзага келган. 2019 йилда сепаратистлар Аден шаҳрини эгаллаб олган, 2020 йилнинг апрелида эса Яманнинг барча жанубий вилоятларида ўз ўзини бошқариш режимини жорий этган.
Изоҳ (0)