Yaman markaziy hukumati va Janubiy o‘tish davri kengashi separatistlari yangi hukumat tuzishga rozi bo‘ldi, bu orqali ular Saudiya Arabistonining mojaroni hal etish borasidagi tashabbusini qo‘llab-quvvatlagan. Bu haqda Saudiya Arabistoni TIV vakili o‘zining Twitter’dagi sahifasi orqali ma’lum qildi.

Foto: Reuters

Xabarda qayd etilishicha, Saudiya Arabistoni tomonidan taklif etilgan rejadan o‘t ochishni to‘xtatish, o‘tish davri kengashining Yaman janubida e’lon qilingan muxtoriyatdan, shuningdek, Aden shahri gubernatori va xavfsizlik rahbarini tayinlashdan voz kechishini o‘z ichiga oladi. Bundan tashqari, Yaman bosh vaziriga 30 kun ichida yangi hukumat tuzish vakolati beriladi.

O‘tish davri kengashining saytida ma’lum qilinishicha, separatistlar aprel oyida joriy etilgan mamlakat janubini mustaqil boshqarish rejimidan voz kechgan.

Janubiy o‘tish davri kengashi 2017-yilda tuzilgan. Bir qancha muddat ular Yamanning tan olingan hukumati bilan birgalikda “Ansar Alloh” xusiylar harakatiga qarshi kurashib kelgan, biroq keyinchalik o‘rada mojaro yuzaga kelgan. 2019-yilda separatistlar Aden shahrini egallab olgan, 2020-yilning aprelida esa Yamanning barcha janubiy viloyatlarida o‘z o‘zini boshqarish rejimini joriy etgan.

Eslatib o‘tamiz, iyul oyining boshlarida Saudiya boshliq koalitsiya Yamandagi xusiylar joylashgan pozitsiyalarga aviazarbalarni amalga oshirgan edi.