2021 йил август ойида Афғонистонда ҳокимият тепасига келган «Толибон» ҳаракати жорий йил 21 мартдан бошлаб, яъни янги ўқув йилидан мамлакат бўйича қизлар учун мактаблар очилишини ваъда қилди. Бу ҳақда ҳаракат расмий вакили, ҳукумат аъзоси Забиҳулло Мужоҳидга таяниб TOLOnews телеканали хабар берди.
Унинг сўзларига кўра толиблар ҳукумати қизларнинг мактабда савод чиқаришига қарши эмас, бироқ улар қизлар ўғил болалардан алоҳида синфларда таҳсил олиши керак деб ҳисоблайди.
Мужоҳиднинг айтишича, қизлар учун мактабларнинг очилишига ўғил болалар учун ҳам, қизлар учун ҳам алоҳида синфхоналар етишмаслиги тўсқинлик қилган.
«Келаси ўқув йили бошлангунича мазкур муаммоларни ҳал этишга ҳаракат қиламиз», — деган у.
Афғонистондаги мактаблар фаолияти мамлакатда «Толибон» вакиллари ҳукуматни эгаллаганидан кейин тўхтаб қолган. Ўтган йили 19 сентябрда мактаблар қайта очилган, бироқ дарсларга фақат ўғил болалар киритилган ва уларга фақат эркак ўқитувчилар дарс берган.
Кейинчалик айрим вилоятларда кичик, ўрта ва катта синфлар учун таълим қайта бошланган. Айни вақтда Афғонистоннинг 34 та вилоятидан фақат 7 тасида қизларнинг мактабларда таълим олиши учун шароитлар мавжуд.
12 январда толиблар ҳукуматида олий таълимга масъул раҳбар Абдул-Боқи Ҳаққоний яқин вақт ичида талаба йигитлар ва қизлар учун Афғонистон давлат университетлари қайта очилишини билдирган. Бироқ Ҳаққоний бу айнан қайси санада амалга ошишига аниқлик киритмаган.
Мавзуга доир:
Изоҳ (0)