Канада ҳукумати «Россия тажовузкорлиги» сабаб ўз фуқароларини Украинага бормасликка чақирди

Канада ҳукумати Россия—Украина чегарасидаги вазиятнинг кескинлашуви сабаб ўз фуқароларига Украинага режалаштирилган сафарларини қолдиришни маслаҳат бермоқда. Бу борадаги тавсия мамлакат ҳукуматининг сайтида эълон қилинган.

«Биз Россиянинг давом этаётган тажовузкорлиги ва мамлакат ичида ҳамда ўз атрофида ҳарбий кучларни ошираётгани боис Украина учун хавф даражасини ‘муҳим бўлмаган саёҳатлардан қочиш’га ўзгартирдик», — дейилади хабарда.

Шу билан бирга, Канада ташқи ишлар вазири Мелани Жоли ушбу ҳафта Киевга ташриф буюриб, Украина бош вазири Денис Шмигал билан учрашади. Учрашув Россиянинг «тажовузкорона ҳаракатлари» фонида Украинани қўллаб-қувватлаш белгиси ҳисобланади.

Таъкидланишича, кўплаб украиналиклар истиқомат қиладиган Канада 2014 йилги воқеалардан сўнг, Россияга нисбатан кескин позицияни эгаллаган.

Мамлакат бош вазири Жастин Трюдо Украина президенти Владимир Зеленский билан гаплашиб, «Украинага нисбатан амалга оширилган ҳар қандай ҳарбий босқинчилик жиддий оқибатларга, жумладан, келишилган санкцияларга олиб келишини таъкидлаган».

14 январь куни АҚШ президентининг миллий хавфсизлик бўйича маслаҳатчиси Жейк Салливан Америка разведкаси Россия Украинага кенг кўламли ҳарбий босқинларни амалга ошириш учун мамлакатга қарши провокация тайёрлаётгани тўғрисида маълумотларга эгалигини маълум қилганди.

Эслатиб ўтамиз, 13 январь куни «Интерфакс» Пентагон раҳбари Ллойд Остин Украина мудофаа вазири Алексей Резников билан музокара ўтказгани ҳақида хабар берди, улар Россия–Украина чегараси яқинида Россия қўшинларининг тўпланиши масаласини муҳокама қилган.

Мудофаа вазири Ллойд Остин украиналик ҳамкасби билан Россиянинг Украина яқинида ҳарбий жиҳатдан сабабсиз ва давомли кучайишини муҳокама қилган. Остин АҚШнинг Украина суверенитети ва ҳудудий яхлитлигини, жумладан, мудофаа қобилиятини мустаҳкамлашга қаратилган саъй-ҳаракатларини сўзсиз қўллаб-қувватлашини яна бир бор тасдиқлаган.

Шунингдек, томонлар кескинликни юмшатиш бўйича дипломатик саъй-ҳаракатларни қўллаб-қувватлаши ва яқиндан ҳамкорликни давом эттиришга интилишини билдирган.