Қашқадарёда ўз хизмат мавқейидан фойдаланиб, тамагирлик қилган Касби тумани тиббиёт бирлашмаси бошлиғининг даволаш ишлари бўйича ўринбосарига суд ҳукми ўқилди. Бу ҳақда Олий суд матбуот хизмати хабар берди.
Маълум қилинишича, Э.Бозоров 2017 йил сентябрь ойидан Касби тумани тиббиёт бирлашмаси бошлиғининг даволаш ишлари бўйича ўринбосари ҳамда тумандаги 16 ёшгача бўлган болаларни ногирон деб топиш комиссияси раиси лавозимида ишлаб келган.
У мансабдор шахс бўлгани ҳолда ўз хизмат мавқейидан фойдаланиб, тамагирлик йўли билан Касби тумани «Назартепа» қишлоғида яшовчи М.Ярматованинг 2019 йилда туғилган ўғли С.М.ни ногиронлик нафақасига чиқариб беришни ваъда қилган. Бунинг эвазига эса фуқародан 600 минг сўм миқдорида пул маблағини талаб қилган.
2021 йил 5 август куни М.Ярматованинг аризаси юзасидан ҳуқуқни муҳофаза қилувчи органлар томонидан тезкор тадбир ўтказилган. Тадбир давомида Э.Бозоров ўзининг хизмат хонасида М.Ярматовадан келишилган пул маблағининг 500 минг сўмини олаётган вақтида тезкор ходимлар томонидан ашёвий далиллар билан қўлга олинган.
Жиноят ишлари бўйича Китоб туман судининг 2021 йил 20 декабрдаги ҳукмига асосан Э.Бозоров Жиноят кодекси 210-моддаси (пора олиш) 2-қисмининг «в» бандида кўрсатилган жиноятни содир қилганликда айбли деб топилган.
Унга нисбатан 5 йил муддатга озодликдан маҳрум қилиш жазоси ҳамда ушбу кодекснинг 45-моддасига (муайян ҳуқуқдан маҳрум қилиш) мувофиқ 2 йил муддатга мансабдорлик ва моддий жавобгарлик вазифаларида ишлаш ҳуқуқидан маҳрум қилиш тариқасидаги қўшимча жазо тайинланган.
Аввалроқ Самарқандда ишга жойлаш учун пора олган мактаб директори ва шифокор қўлга олингани тўғрисида хабар берилганди.
