Qashqadaryoda o‘z xizmat mavqeyidan foydalanib, tamagirlik qilgan Kasbi tumani tibbiyot birlashmasi boshlig‘ining davolash ishlari bo‘yicha o‘rinbosariga sud hukmi o‘qildi. Bu haqda Oliy sud matbuot xizmati xabar berdi.
Ma’lum qilinishicha, E.Bozorov 2017-yil sentabr oyidan Kasbi tumani tibbiyot birlashmasi boshlig‘ining davolash ishlari bo‘yicha o‘rinbosari hamda tumandagi 16 yoshgacha bo‘lgan bolalarni nogiron deb topish komissiyasi raisi lavozimida ishlab kelgan.
U mansabdor shaxs bo‘lgani holda o‘z xizmat mavqeyidan foydalanib, tamagirlik yo‘li bilan Kasbi tumani “Nazartepa” qishlog‘ida yashovchi M.Yarmatovaning 2019-yilda tug‘ilgan o‘g‘li S.M.ni nogironlik nafaqasiga chiqarib berishni va’da qilgan. Buning evaziga esa fuqarodan 600 ming so‘m miqdorida pul mablag‘ini talab qilgan.
2021-yil 5-avgust kuni M.Yarmatovaning arizasi yuzasidan huquqni muhofaza qiluvchi organlar tomonidan tezkor tadbir o‘tkazilgan. Tadbir davomida E.Bozorov o‘zining xizmat xonasida M.Yarmatovadan kelishilgan pul mablag‘ining 500 ming so‘mini olayotgan vaqtida tezkor xodimlar tomonidan ashyoviy dalillar bilan qo‘lga olingan.
Jinoyat ishlari bo‘yicha Kitob tuman sudining 2021-yil 20-dekabrdagi hukmiga asosan E.Bozorov Jinoyat kodeksi 210-moddasi (pora olish) 2-qismining “v” bandida ko‘rsatilgan jinoyatni sodir qilganlikda aybli deb topilgan.
Unga nisbatan 5 yil muddatga ozodlikdan mahrum qilish jazosi hamda ushbu kodeksning 45-moddasiga (muayyan huquqdan mahrum qilish) muvofiq 2 yil muddatga mansabdorlik va moddiy javobgarlik vazifalarida ishlash huquqidan mahrum qilish tariqasidagi qo‘shimcha jazo tayinlangan.
Avvalroq Samarqandda ishga joylash uchun pora olgan maktab direktori va shifokor qo‘lga olingani to‘g‘risida xabar berilgandi.
Izoh (0)