Рамзан Қодиров 3 кунлик муҳлат ичида ингуш халқидан унга қарши бирорта айблов қўйилмаганини маълум қилди

Ингушетия аҳолисига унга қарши айбловлар қўйиш учун уч кун муҳлат берган Чеченистон раҳбари Рамзан Қодировга нисбатан ҳеч қандай шикоят келиб тушмади. Бу ҳақда Қодиров Instagram’даги жонли эфирда маълум қилди.

«Бугун уч кун ўтди, ҳеч ким қон адоватини эълон қилмади, ҳеч ким халқ оқсоқолларига, Чеченистон муфтийларига мурожаат билан чиқмади, бунинг учун Яратганга шукрлар айтаман. Бу бизнинг биродар эканимиздан далолат беради. Бизда, шахсан мен —Рамзан Қодировда Ингушетия билан боғлиқ ҳеч бир муаммо йўқлигини эълон қилмоқчиман», — дейди Чеченистон раҳбари қисман рус, қисман чечен тилидаги чиқишида.

«Рамзан Ингушетия ва ингуш халқининг душмани эмас. Биз биродармиз ва шундай бўлиб қоламиз... Демак, ҳуқуқ ҳимоячилари номи остидаги порахўр шоқоллар, сиз халқларимизни парчалаб ташлай олмайсизлар», — дея қўшимча қилган Қодиров.

Чеченистон миллий сиёсат, ташқи алоқалар, матбуот ва ахборот вазири Ахмед Дудаевнинг айтишича, Қодиров Ингушетия ҳақидаги барча салбий баёнотларни ижтимоий тармоқлардан учириб ташлашга чақирган. «Ҳиссиётлар таъсирида ёки бошқа сабабларга кўра интернетда ингуш халқи ёки уларнинг бирор вакили ҳақида салбий баёнот эълон қилган ҳар бир кишидан уни ўчириб ташлашни сўраймиз», — деди Дудаев.

12 январь куни Рамзан Қодиров Ингушетия аҳолисига унга нисбатан асосли айбловлар қўйиш учун уч кун муҳлат берганди. Бу Ингушетия собиқ амалдорининг Қодировни қучоқлаб саломлашгани учун халқидан кечирим сўрагани сабаб келиб чиққан можаро фонида юз берди.

«Ингуш халқидан илтимос. Агар мен душманингиз бўлсам, айбим ва жазо даражасини белгилаб олинг. Нима қилмоқчи эканингизни айтинг: уриш, қувиш, ўлдириш. Нимада айбдор эканимни Россиянинг давлат ёки шариат қонунлари бўйича асосланг ва менинг халқимга, оқсоқолларимга мурожаат қилинг ҳамда расмий жазони билдиринг, барча анъаналаримизга риоя қилинг», — деган Қодиров ўз мурожаатида.

Шундан сўнг ингушларнинг «Мехк-Кхел» жамоат ташкилоти ҳамраиси Сараждин Султигов YouTube’да Қодировга ўз даъволарини билдирган видеосини эълон қилди. У Чеченистон ва Ингушетия ўртасидаги чегараларни аниқлаш бўйича икки томонлама комиссия тузишни, чечен расмийларидан эса қўшни республика аҳолисини хафа қилмасликни сўради.

Чеченистон ва Ингушетия ўртасидаги чегара ҳудудлари учун можаро СССР парчаланганидан кейин бошланган, чунки республикалар ўртасидаги чегара аниқ белгиланмасдан, улар ягона Чечен-Ингуш АССР таркибида эди.