Европа Иттифоқи мамлакатлари 15 январь куни киберҳужумларга қарши кураш бўйича олти ҳафталик машғулотларни бошлади. Бу ҳақда Bloomberg нашр қўлидаги ҳужжатларга таяниб хабар берди.
Тадбир иттифоқчи давлатларнинг киберсоҳадаги йирик инқирозга, жумладан, мониторинг ва таҳдид манбасини топиш, шунингдек, ҳужумга қарши курашиш ва унинг оқибатларини бартараф этишга қай даражада тайёрлигини аниқлаб бериши керак.
Ҳужжатларда қайд этилишича, Евроиттифоқ мамлакатлари рақамли маконда бир-бири билан чамбарчас боғланган, шунинг учун бир мамлакатдаги эҳтимолий хакерлик бошқаларга ҳам таъсир қилиши мумкин. Машғулотлар иттифоқ мамлакатларига хакерлик ҳужумларига қарши ҳамкорликни йўлга қўйишга ёрдам беради.
Машғулотлар давомида иштирокчи давлатлардан биргаликда оммавий ахборотни ташкил қилиш ва киберҳужумга дипломатик жавоб чораларини келишиб олиш талаб этилади. Машқлар учун Финляндиянинг хаёлий энергетика компаниясига киберҳужум симуляцияси уюштирилади, деб ёзган Bloomberg.
Европа Иттифоқида ушбу машғулотлар Украина ҳукумати веб-сайтларига киберҳужум уюштирилган куни бошланган. 14 январга ўтар кечаси хакерлар 70 та портални, жумладан, Украина Вазирлар Маҳкамаси, Таълим ва фан, Ташқи ишлар, Транспорт, Молия вазирликлари ва бошқа идораларнинг веб-сайтларини бузиб кирган. Уларнинг саҳифаларида украин, рус ва поляк тилларида «қўрқинг ва энг ёмонини кутинг» деган чақириқ пайдо бўлган. Украина Хавфсизлик хизмати (УХХ) сайтларнинг контенти бузилмагани ва шахсий маълумотлар сизиб чиқмаганини маълум қилган.
УХХ киберҳужумни «Россия Федерацияси махсус хизматлари билан боғлиқ хакерлик гуруҳлари» амалга оширган бўлиши мумкин, дея тахмин қилди. Украина Миллий хавфсизлик ва мудофаа кенгаши котиби ўринбосари Сергей Демедюк ҳужумни Беларусь разведкаси билан боғлади. Россия президенти матбуот котиби Дмитрий Песков Россиянинг хакерлик ҳужумига алоқадорлигини рад этди.
Европа Иттифоқининг ташқи ишлар ва хавфсизлик сиёсати бўйича олий вакили Жозеп Боррел 13 январь куни Иттифоқ ташқи ишлар вазирларининг йиғилишида Украинага «кибер ҳужумларга қарши курашда қўллаб-қувватлаш миссияси» жўнатилганини эълон қилганди. Боррелнинг сўзларига кўра, кибер таҳдид «украиналиклар дуч келиши мумкин бўлган хавфлардан биридир».Кейинроқ, Украина сайтлари хакерлик ҳужумига учрагач, Европа Иттифоқи ҳужумни қоралаб, унинг оқибатларига қарши курашда Киевга ёрдам беришга тайёрлигини билдирди.
Мавзуга доир: Хакерлар Аргентина Сенатига киберҳужум уюштирди
Изоҳ (0)