Пекин коронавируснинг омикрон штамми билан касалланиш бўйича дастлабки ҳолат ҳақида хабар берди. Шаҳарда қишки Олимпия ўйинларининг бошланишига уч ҳафта қолган, деб ёзади Guardian.
Пекин Касалликларни назорат қилиш бошқармаси расмийсининг матбуот анжуманида хабар беришича, лаборатория текширувлари коронавирусни юқтирган одамдаги штаммда «омикронга хос мутациялар» борлигини кўрсатган.
«Инфекцияни юқтирган шахс Хайдяннинг шимоли-ғарбий пойтахт ҳудудида яшаб, ишлайди. У сўнгги икки ҳафта давомида Пекиндан ташқарига чиқмаган», — дейилади ОАВ хабарида.
Бемор яшайдиган ва ишлайдиган ҳудудда расмийлар оммавий текширувдан ўтказмоқда. Аввал омикрон Хитойнинг бир қатор шаҳарларида, жумладан, Шанхай, Сиан, Чжухай, Чжуншан ва Тянсзинда топилган.
ОАВ Пекинда омикрон билан касалланиш ҳолати шаҳарда 4—20 февраль кунлари бўлиб ўтиши режалаштирилган қишки Олимпия ўйинлари очилишидан бироз олдин аниқланганини таъкидлади.
15 январь куни Хитойда 119 кишида коронавирус қайд этилган, улардан 65 нафари инфекцияни мамлакат ичида юқтирган.Пандемия бошланганидан буён Хитойда коронавирусга чалиниш бўйича 104 864 та ҳолат аниқланган, 4 636 киши касаллик оқибатида вафот этган. Шу билан бирга 2021 йил ва 2022 йил бошидан буён мамлакат бўйлаб атиги бир киши коронавирусдан вафот этган.
Изоҳ (0)