15 январдан бошлаб Ўзбекистон аэропортларида коронавирусга қарши мажбурий тест топшириш жорий этилганди. Ушбу тартиб ортидан йўловчиларга айрим муаммоларни келтириб чиқарди.
Хусусан, Тошкент халқаро аэропортида вирус тарқалиши хавфини оширган ҳолда тест олиш учун турнақатор навбатлар юзага келгани акс этган видеолар тарқалди. «Podrobno.uz»нинг ёзишича, бунга тест синовлари ўтказиладиган пунктлар ҳамда валюта айирбошлаш шохобчалари етарли эмаслиги сабаб бўлган.
Тест синовидан ўтиш қиймати Марказий банк курси бўйича сўм эквивалентида 5 доллар миқдорида белгиланганди. Мамлакатга келган аксарият йўловчиларда сўм бўлмагани учун улар дастлаб валютани сўмга айирбошлаш учун, сўнг экспресс-тестдан ўтиш учун бошқа навбатда туришларига тўғри келмоқда.
Шу билан бирга, кўпчилик расмийларнинг бундай қарор (мажбурий тест жорий этилиши — таҳр.) қабул қилганининг ўзи ғазабланган. Чунки барча келган йўловчилар салбий ПЗР тестига эга ва нима учун улар яна экспресс-тестдан ўтишлар кераклигини тушунмаган. Айримлар эса тест нархи 5 доллар этиб белгиланганини қиммат ва ортиқча харажат деб ҳисобламоқда.
Санитария-эпидемиологик осойишталик ва жамоат саломатлиги хизмати муносабати
Ҳолатга муносабат билдирган Санитария-эпидемиологик осойишталик ва жамоат саломатлиги хизматининг қайд этишича, ПЗР тест топширган инсонларда ҳам вирус аниқланмоқда.
15 январь куни Тошкент шаҳрига учиб келган 3 801 нафар фуқародан ҳам тест синамалари олинган. Уларнинг барчасида манфий ПЗР тести бўлганлигига қарамасдан 67 нафарида мусбат натижа аниқланган. Юртимиздаги барча чегара пунктлари орқали шу куни 15 041 нафар фуқаро ўтган. Улардан 151 нафарида коронавирусда мусбат натижа аниқланган.
«Қўлида касалликдан фориғлиги ҳақида маълумоти бўлган фуқароларнинг ‘нега яна қайта экспресс тест топширишим керак?’ деб ўйлашлари табиий. Лекин кўриб турганингиздек, ПЗР тест топширган инсонларда ҳам вирус аниқланмоқда. Бу эса касаллик янада ‘айёрлашиб’, яширин кўринишга кириб бораётганидан далолат. Бундай ҳолатда юртимизга кириб келувчи ҳар бир фуқарони коронавирусга экспресс-антиген тест топширтириб қабул қилиш энг тўғри йўлдир», — дейилади ССВ томонидан эълон қилинган муносабатда.
Қайд этилишича, 5 доллар эквивалентида белгиланган экспресс тест нархи дунё кўрсаткичларига нисбатан энг арзон нархлардандир. Шунингдек, тест топшириш жараёнида талабалик гувоҳномасини тақдим этган талабаларга 50 фоиз чегирма берилади. I ва II гуруҳ ногиронлиги бор шахслар учун тестлар бепул. Икки ёшгача бўлган болалардан тест олинмайди. Бу тадбирлардан мақсад аҳолининг саломатлигини сақлаш ишларини самарали ташкил этишдир.
Вақтинча жорий этилган бу тартиб коронавирус инфекциясини юқтирган фуқароларни тезкор аниқлаш, даволаш ва инфекция тарқалишининг олдини олишга хизмат қилади.
«Шунинг учун юртдошларимиздан мазкур чора-тадбирларни тўғри қабул қилиб, ўз фуқаролик бурчини англаб, мамлакатимиз ҳудудида коронавирус пандемиясининг янги тўлқини кўтарилмаслиги учун шахсан ҳисса қўшишларини сўраб қоламиз», — дейилади Санитария-эпидемиологик осойишталик ва жамоат саломатлиги хизмати муносабатида.
Изоҳ (0)