Калифорния губернатори Гевин Нюсом 1968 йилда АҚШ сенатори Роберт Кеннедига суиқасд уюштирганликда айбдор деб топилган Серхан Серханни муддатидан олдин озод қилиш ҳақидаги илтимосни рад этди. Бу ҳақда Reuters хабар берди.
Аввалроқ Шартли равишда муддатидан олдин озодликка чиқариш комиссияси 77 ёшли Серханнинг илтимосномасини кўриб чиқиб, уни озод этиш мумкин, деган хулосага келганди. Калифорния губернатори бу фикрга қўшилмади. Лос Ангелес Times газетасида Нюсом ўз қарорини шундай изоҳлаган:
«Ишни, шу жумладан, Калифорния штати архивидаги ёзувларни синчиклаб кўриб чиққанимдан сўнг, мен Серхан жамиятга хавф туғдирмаслик учун зарур бўлган масъулият ва хабардорлик даражасига етмаган, деган хулосага келдим».
Серханнинг ҳимоячиси губернатор қарори устидан шикоят қилмоқчи, деди судланувчининг адвокати Анжела Берри. Роберт Кеннедининг беваси ва олти нафар фарзанди маълум қилишича, улар Серханни шартли равишда озодликка чиқариш рад этилганини «чуқур енгиллик билан» қабул қилган.
Муддатидан олдин озодликка чиқиш Серхан учун ўн олтинчи маротаба рад этилди.
Роберт Кеннеди 1963 йил 22 ноябрда Далласда ўлдирилган АҚШ президенти Жон Кеннедининг укаси. Роберт Кеннедининг ўлдирилиши, худди акаси Жоннинг ўлими каби, кўплаб фитна назарияларини келтириб чиқарган.
Фаластинлик Серхан Серхан Роберт Кеннедини 1968 йилнинг июнида Лос-Анжелесдаги «Амбассадор» меҳмонхонасида отиб кетган. Қотилликка Кеннеди Исроилни қўллаб-қувватлагани сабаб бўлган. Жиноят содир этган вақтда Серхан 24 ёшда бўлган. Аввалига Серхан ўлим жазосига ҳукм этилган, аммо кейинроқ жазо умрбод қамоқ жазоси орқали енгиллаштирилган.
Изоҳ (0)