«Интер» Дибалани эркин агент сифатида ўз сафига қўшиб олмоқчи. Пауло «Ювентус» билан келиша олмаяпти

«Интер» Пауло Дибалани ўз сафига қўшиб олмоқчи.

Football Italia хабарига кўра, «нераззурилар» «Ювентус» ҳужумчиси Пауло Дибалани эркин агент сифатида қўлга киритиш истагида.

«Интер» бош директори Беппе Маротта футболчининг агенти билан боғланган ва битим тафсилотларини муҳокама қилган.

Милан жамоаси Дибалага йилига 7,5 миллион евро маош ва 5 йиллик шартнома таклиф қилмоқчи. Ундан ташқари, футболчига ҳар бир мавсум учун бонуслар, шартнома учун ҳам катта миқдордаги бонус ваъда қилинган. Пауло «Ювентус»да йилига 7,3 миллион евро маош олади.

Паулонинг Турин клуби билан шартномаси 2022 йилда ўз ниҳоясига етади.

Аввалроқ агар шартномани узайтириш борасидаги вазият тубдан ўзгармаса, Турин клуби билан ҳамкорликни узайтирмаслиги ҳақида хабар берилганди. Дибала «Ювентус» унинг янги битим бўйича қўйган шартларига кўнмаганидан ранжиган.

Клуб Паулонинг маошини оширмаслиги, энг яхши ҳолатда келишув аввалги шартлар асосида узайтирилиши маълум қилинганди.

Жорий мавсум аргентиналик ҳужумчи А Серияда 15 та ўйинда майдонга тушиб, 6 та гол ва 3 та голли узатмани ўз ҳисобига ёздириб қўйди.