Қозоғистон Миллий хавфсизлик қўмитаси (МХҚ)нинг собиқ раиси Карим Масимовга нисбатан давлатга хиёнат бўйича судга қадар тергов иши давом этмоқда. Масимовдан ташқари қўмита раисининг икки собиқ ўринбосари ҳам ҳибсга олинган, дейилади Asia-Plus хабарида.
Мазкур иш доирасида ҳокимиятни зўрлик билан эгаллаб олиш ва мансаб ваколатларини суиистеъмол қилишга қаратилган ҳаракатлар юзасидан судга қадар қўшимча текширувлар ўтказилмоқда.
«Ушбу жиноятларни содир этганликда гумон қилиниб, Карим Масимовдан ташқари, МХҚ раисининг собиқ ўринбосари — ‘А’ махсус хизмати бошлиғи Ануар Садиқулов ва қўмита раисининг ўринбосари Даулет Ергожин ҳибсга олинган», — дейилади хабарда.
Ҳозирда тергов давом этмоқда.
8 январь куни МХҚ собиқ раиси Карим Масимов ҳибсга олингани ҳақида хабар берилганди. 6 январь куни Масимов қўмита раиси лавозимидан озод этилган. Эрмек Сагимбаев МХҚнинг янги раҳбари бўлган.
Мавзуга доир: Нур-Султонда Қозоғистон Миллий хавфсизлик қўмитаси полковниги ўлик ҳолда топилди. Таразда ИИВ генерали ўз жонига қасд қилди
«Киритилаётган сўровлар юзасидан шуни маълум қиламизки, МХҚ раисининг биринчи ўринбосари С.Абиш ўз лавозимида фаолият юритишда давом этмоқда, айни пайтда у йиллик таътилда», — дейилади хабарда.
Қозоғистонда 2 январь куни газ нархи кескин ошиши сабабли оммавий норозилик намойишлари бошланиб, бир неча кундан сўнг улар тартибсизликларга айланди. 4 ва 5 январь кунлари Олмаотада намойишчиларнинг хавфсизлик ходимлари билан тўқнашуви кузатилди. Қозоғистондаги тартибсизликлар фонида мамлакат бўйлаб фавқулодда ҳолат эълон қилинган. 6 январда Коллектив Хавфсизлик Шартномаси Ташкилоти (КХШТ) тинчликпарвар кучлари Қозоғистонга жўнатди. 7 январда мамлакат президенти Қосим-Жўмарт Тўқаев Қозоғистонда конституциявий тартиб тикланганини эълон қилди ва мамлакат бўйлаб террорчилик хавфининг юқори даражаси жорий этилди.
Мавзуга доир: «Қотиллар билан қандай қилиб музокара олиб бориш мумкин?» — Тўқаев «террорчиларга» қарши огоҳлантирмасдан ўқ узишни буюрди
4918 нафар шахс турли турдаги маъмурий жавобгарликка тортилди, шу жумладан, 1978 нафар шахс ҳибсга олинди. 791 нафар шахс жаримага тортилди, 2149 нафари огоҳлантирилди. Судлар томонидан 2048 та материал кўриб чиқилмоқда.
Бугунги кунда тергов-тезкор гуруҳлар томонидан 494 та жиноий иш, жумладан, террорчилик ҳаракатлари бўйича 44 та, оммавий тартибсизликлар бўйича 34 та, қотиллик ҳолатлари бўйича 15 та ва бошқа жиноий ишлар бўйича тергов ҳаракатлари олиб борилмоқда
Жиноят содир этганликда гумон қилинган 524 нафар шахс вақтинчалик сақлаш ҳибсхонасига жойлаштирилган. Суд санкцияси билан 412 нафар шахс қамоққа олинган. Ҳозирда керакли тергов ҳаракатлари олиб борилмоқда.
Изоҳ (0)