Fransiya janubi-g‘arbida kuchli yomg‘irlar oqibatida katta suv toshqinlari kuzatildi, tabiiy ofat oqibatida bir nafar ayol halok bo‘lgan. Bu haqda The Local xabar berdi.
Yuqori Garonna va Aryejda 2 kun ichida bir oylik me’yordagi yog‘ingarchilik kuzatildi va Garonna daryosi qirg‘oqlaridan toshdi.
Tuluzada daryodagi suv sathi 4 metr 31 santimetrni tashkil qilgan va bu me’yoriy darajadan ancha baland. 70 yoshli ayol Tuluza g‘arbidagi Mervil yaqinidagi uyi oldida suvga cho‘kib, halok bo‘lgan.
Tuluza yaqinidagi bir nechta kommunalarda maktablar yopilgan va maktab avtobuslarining harakati bekor qilingan.
Tuluzadagi metro bekatlaridan biri suv toshqinlari tufayli yopilgan. Tuluza atrofidagi va Lurd shahriga eltuvchi yo‘llar to‘liq suv ostida qolgan.
Yuzlab odamlar Tuluzaning Il-de-Rame orolidagi talabalar yotoqxonalariga evakuatsiya qilingan va ularning ko‘pchilik qismi sport zallarida tunagan.
Avvalroq Fijida Cody sikloni tufayli katta suv toshqinlari kuzatilgani, Eronda yirik suv toshqinlari oqibatida 8 kishi halok bo‘lgani, Braziliyada suv toshqinlari tufayli 100 ta shaharda favqulodda holat e’lon qilingani, Malayziyada yirik suv toshqinlari yuz berib, 25 mingdan ortiq odam evakuatsiya qilingani haqida xabarlar berilgan.
Izoh (0)