10 январга ўтар кечаси Тошкент шаҳрининг Юнусобод туманида номаълум шахслар 4 туп элдор қарағайини кесиб ташлади. Бу ҳақда Ўзбекистон Экология ва атроф-муҳитни муҳофаза қилиш давлат қўмитаси матбуот хизмати хабар берди.
2021 йил 14 декабрь куни Амир Темур ва Чинобод кўчалари чорраҳаси ёнида ўсиб турган 18 туп дарахтнинг 10 тупи номаълум шахслар томонидан ярмигача арралаб кетилган эди. Ҳудудда истиқомат қилувчи аҳолининг таъкидлашича, аввалроқ ҳам дарахтларни қуритишга уринишлар бўлган. Қурилиш амалга ошиши керак бўлган ҳудуд олдин ўраб олинган, арчаларни қуритиш учун таглари кесиб чиқилган.
Дарахтлар ўсиб турган участка электрон аукционда доимий фойдаланиш ҳуқуқини қўлга киритган тадбиркорга пойтахт ҳокимлиги томонидан бириктирилган.
«Gazeta.uz»нинг ёзишича, аукцион 2020 йилнинг ёзида бўлиб ўтган. Бошланғич баҳоси 168 миллион сўмни ташкил этган ер якунда қарийб 1 миллиард сўмга сотилган. Ер участкасининг майдони 115 квадрат метр бўлиб, ҳужжатларда офис биноси ва новвойхона қуриш учун тақдим этилгани кўрсатилган.
Участкага туташ кўп қаватли уйлар аҳолиси қурилишга қарши чиққан. Тошкент шаҳар экология ва атроф-муҳитни муҳофаза қилиш бошқармаси дарахтларни кўчириб ўтказишни рад этган.
Кечаси 10 туп дарахт кесилгач, экологлар ботаника боғи мутахассисларини жалб қилган ҳолда зарарланган дарахтларни сақлаб қолиш учун агротехник тадбирларни амалга оширган. Қарағай дарахтлари танасидаги жароҳатлар даволанган ва ёпилган, дарахтлар рақамланган. Шов-шувларга қарамай, дарахтларга иккинчи марта суиқасд уюштирилган. Фотосуратларга қараганда, баъзи дарахтларни кесишга улгуришмаган.
Экология давлат қўмитаси маълумотларига кўра, участкага ҳуқуқ эгаси тадбиркор Ж.Г. ҳуқуқ-тартибот органларига экологлар устидан ариза билан мурожаат қилган. Унда айтилишича, дарахтларни кўчириб ўтқазишдан бош тортиш унинг ҳуқуқларини бузади. Суд унинг шикоятини қаноатлантиришни рад этган.
«Мазкур участкадаги қонун бузилиши ҳолатларини ўрганиш бўйича тузилган махсус ишчи гуруҳи томонидан тўпланган маълумотлар билан бирга ҳужжатлар қонуний чора кўриш учун Юнусобод туман прокуратурасига тақдим этилган. Ички ишлар органлари билан ҳамкорликда дарахтларга зарар етказган шахсларнинг шахсини аниқлаш чоралари кўрилмоқда», — дейилади хабарда.
Шу куни тунда ҳодиса жойига Экоқўм раиси ўринбосари Жусипбек Казбеков бошчилигидаги қўмита вакиллари ташриф буюрди.
Қўмита баёнотида қайд этилишича, ўрмон фондига кирмайдиган дарахтларнинг кесилишига жорий этилган мораторий муддатсиз даврга узайтирилган вақтда юз берган бу ҳолатни ҳеч нарса билан оқлаб бўлмайди. Қўмита раҳбарияти ҳуқуқбузарларга нисбатан тез кунда қатъий чоралар кўрилишини изчил назорат қилади.
Аввалроқ Жаҳонгир Ортиқхўжаев Тошкентда дарахтлар кесилишида ҳокимликнинг ҳам айби борлигини тан олгани, Тошкентда 81 та дарахтнинг кесилишига оид тергов иши қайта тиклангани тўғрисида хабар берилганди. «Республикада кўкаламзорлаштириш ишларини жадаллаштириш, дарахтлар муҳофазасини янада самарали ташкил этиш чора-тадбирлари тўғрисида»ги президент фармонига кўра, Ўзбекистонда дарахт кесишга мораторий муддатсиз даврга узайтирилган.
Изоҳ (0)