Тошкент кимё-технология институти 2022/2023-ўқув йилидан бошлаб табақалаштирилган тўлов-контрактларидан воз кечиши мумкин. Бу ҳақда «Расмий хабарлар» маълум қилди.
Қайд этилишича, Тошкент кимё технология институти ректори Ботир Усмонов АОКАда ўтказилган матбуот анжуманида институтга молиявий мустақиллик берилганини билдириб, бу йил иккинчи семестр учун нархлар ўзгармаслигини маълум қилган.
Шунингдек, у келаси ўқув йилидан бошлаб супер-контрактга талаба қабул қилишдан воз кечишга ҳаракат қилинишини айтиб, сабабини қуйидагича изоҳлаган:
«Чунки биз таълим сифатига асосланган бренд яратишни мақсад қилганмиз. Шу боис фақат иқтидорли ва ишлаб чиқарувчиларга маъқул келадиган номзодларни талабаликка қабул қиламиз».
Маълумот учун, табақалаштирилган тўлов-контрактни тўплаган баллари тасдиқланган тўлов-контракт доирасидаги қабул параметрлари чегарасига 4,05 баллдан ортиқ етмаган, 56,7 баллдан кам бўлмаган ҳолда, қўшимча равишда ўқиш истагини билдирган абитуриентларнинг биринчи ўқув йили учун тўлайди. Талабалар биринчи ўқув йилини тугатгандан сўнг кейинги ўқув йилидан бошлаб амалда ўрнатилган базавий тўлов-контракт миқдори асосида ўқишини давом эттиради.
Аввалроқ Ўзбекистонда абитуриентларга табақалаштирилган тўлов-шартномаларини онлайн расмийлаштириш имконияти яратилгани, 2021/2022-ўқув йили учун супер-контракт миқдорлари тасдиқлангани хабар қилинганди.
Изоҳ (0)