O‘zbekistonda 2021-yilning 10 oyi davomida daraxtlarning noqonuniy kesilishidan keltirilgan zarar 10 mlrd so‘mdan oshdi

Oliy Majlis Qonunchilik palatasining navbatdagi majlisida O‘zbekistondagi yashil maydonlarni rivojlantirish borasida olib borilayotgan ishlar to‘g‘risida”gi Qonunchilik palatasining parlament so‘roviga Ekologiya va atrof-muhitni muhofaza qilish davlat qo‘mitasi raisi o‘rinbosari Jusipbek Kazbekovning javobi ko‘rib chiqildi. Bu haqda Qonunchilik palatasi matbuot xizmati xabar berdi.

Uning ma’lumotlariga ko‘ra, moratoriy davrida 6 mingdan oshiq jismoniy va yuridik shaxslar tomonidan 417,4 ming tupga yaqin davlat o‘rmon fondiga kirmaydigan daraxt va butalarni kesishga ruxsat so‘rab murojaat qilingan. Qo‘mita shundan 210,5 ming tupdan oshiq sharq chinori, eman, qrim qarag‘ayi, chinorsimon zarang, eldor qarag‘ayi, kashtan, shumtol, turang‘il hamda boshqa 20 turdan ortiq qimmatbaho daraxt va butalarning kesilishini rad etilgan.

Bundan tashqari, 2021-yilning 10 oyi davomida 4067 nafar fuqaro va mansabdor shaxslar tomonidan daraxt va butalarni noqonuniy kesish holatlari aniqlangan. Ushbu qonunbuzarliklar uchun 5,34 milliard so‘m jarima, 10,68 milliard so‘m zarar summalari qo‘llangan. Ma’muriy huquqbuzarliklar to‘g‘risida ish yuritilgan hamda 3,12 milliard so‘m jarima va 4 milliard so‘mdan ortiq zarar summalari undirib olingan.

Parlament so‘roviga javobda qayd etilishicha, Davlat o‘rmon fondiga kirmaydigan daraxt va butalarni xatlovdan o‘tkazish doirasida 10 million 412 ming 279 dona daraxtlar xatlovdan o‘tkazilgan bo‘lib, shundan 8 million 544 ming 826 donasi elektron bazaga kiritilgan.

Oliy Majlis Qonunchilik palatasi deputati Rasul Kusherbayevning yozishicha, 2019-yilda — 2598 nafar, 2020-yilda — 3960 nafar, 2021-yilning 10 oyi davomida esa 4067 nafar shaxs tomonidan noqonuniy daraxt kesish holatlari amalga oshirilgani aniqlangan.

“Raqamlarga qaralsa yo daraxt kesuvchilar ko‘paymoqda yoki uni aniqlash holati ortgan. Nima bo‘lgandayam, ahvolimiz yaxshimas. Daraxt kesishniyam to‘xtata olmayapmiz, kamiga kesgani uchun undirilgan pullarniyam topolmayapmiz”, — deb yozadi u.

Avvalroq O‘zbekistonda daraxtlarni kesishga moratoriy 2024-yilga qadar uzaytiriladi va ekopolitsiya tashkil etilishi to‘g‘risida xabar berilgandi.

Eslatib o‘tamiz, Shavkat Mirziyoyev 24-avgust kuni atrof muhitni muhofaza qilish sohasidagi ustuvor vazifalarga bag‘ishlangan videoselektor yig‘ilishida ushbu sohada tashabbus va amaliy ishlari ko‘rinmayotgani uchun Ekologiya qo‘mitasi raisi Alisher Maqsudovni ishdan olgandi. Yig‘ilishda viloyat hokimlariga yil yakuniga qadar istirohat bog‘larida aholi uchun “sokin hudud”larni tashkil etish topshirilgan.