Алихон Смаилов Қозоғистоннинг янги бош вазири этиб тайинланди

Қозоғистон президенти Қосим-Жўмарт Тўқаев парламентдаги чиқиши чоғида Алихон Смаиловни бош вазир этиб тайинлашни таклиф қилди. Унинг номзоди депутатлар томонидан бир овоздан қўллаб-қувватланди. Смаилов 5 январдан бери ҳукумат раҳбари вазифасини бажариб келаётган эди, бунгача эса у бош вазирнинг биринчи ўринбосари бўлган.

Қозоғистон президенти Мажлисга (парламент қуйи палатаси) янги бош вазирнинг номзодини киритган. Парламент мажлиси видеоалоқа режимида ўтказилган. Алихон Смаиловнинг бош вазир этиб тайинланиши учун депутатларнинг барчаси овоз берган. Шундан сўнг Тўқаев тегишли фармонни имзолаган.

2 январь куни Қозоғистонда суюлтирилган газ нархи ошиши сабабли норозилик намойишлари бошланиб, кейинчалик тартибсизликларга айланиб кетганди. Намойишчилар талаби билан Қозоғистон ҳукумати истеъфога чиқарилган. Тўқаев намойишларни давлат тўнтаришига уриниш сифатида баҳолаган.

Тартибсизликлар фонида, шунингдек, 5 январь куни Тўқаев Қозоғистон биринчи президенти Назарбоевнинг ўрнига Хавфсизлик кенгашини бошқаришга киришганди. Кейинроқ Назарбоевнинг матбуот котиби Айдос Укибай Назарбоев Хавфсизлик кенгаши раҳбарлигини ўз ихтиёри билан топширганини маълум қилди.

Алихан Смаилов Асханович 1972 йил 18 декабрда Олмаотада туғилган. Сиёсатчи 1994 йилда Ал-Фаробий номидаги Қозоғистон давлат миллий университетининг амалий математика мутахассислигини тамомлаган. 1996 йилда эса Қозоғистон Республикаси президенти ҳузуридаги Қозоғистон менежмент, иқтисодиёт ва прогнозлаш институтида давлат бошқаруви магистри даражасини олган.

Аввал Смаилов Қозоғистон бош вазирининг биринчи ўринбосари – Қозоғистон молия вазири лавозимида ишлаган, 5 январдан Қозоғистон бош вазири вазифасини бажарувчиси бўлган.