Alixon Smailov Qozog‘istonning yangi bosh vaziri etib tayinlandi

Qozog‘iston prezidenti Qosim-Jo‘mart To‘qayev parlamentdagi chiqishi chog‘ida Alixon Smailovni bosh vazir etib tayinlashni taklif qildi. Uning nomzodi deputatlar tomonidan bir ovozdan qo‘llab-quvvatlandi. Smailov 5-yanvardan beri hukumat rahbari vazifasini bajarib kelayotgan edi, bungacha esa u bosh vazirning birinchi o‘rinbosari bo‘lgan.

Qozog‘iston prezidenti Majlisga (parlament quyi palatasi) yangi bosh vazirning nomzodini kiritgan. Parlament majlisi videoaloqa rejimida o‘tkazilgan. Alixon Smailovning bosh vazir etib tayinlanishi uchun deputatlarning barchasi ovoz bergan. Shundan so‘ng To‘qayev tegishli farmonni imzolagan.

2-yanvar kuni Qozog‘istonda suyultirilgan gaz narxi oshishi sababli norozilik namoyishlari boshlanib, keyinchalik tartibsizliklarga aylanib ketgandi. Namoyishchilar talabi bilan Qozog‘iston hukumati iste’foga chiqarilgan. To‘qayev namoyishlarni davlat to‘ntarishiga urinish sifatida baholagan.

Tartibsizliklar fonida, shuningdek, 5-yanvar kuni To‘qayev Qozog‘iston birinchi prezidenti Nazarboyevning o‘rniga Xavfsizlik kengashini boshqarishga kirishgandi. Keyinroq Nazarboyevning matbuot kotibi Aydos Ukibay Nazarboyev Xavfsizlik kengashi rahbarligini o‘z ixtiyori bilan topshirganini ma’lum qildi.

Alixan Smailov Asxanovich 1972-yil 18-dekabrda Olmaotada tug‘ilgan. Siyosatchi 1994-yilda Al-Farobiy nomidagi Qozog‘iston davlat milliy universitetining amaliy matematika mutaxassisligini tamomlagan. 1996-yilda esa Qozog‘iston Respublikasi prezidenti huzuridagi Qozog‘iston menejment, iqtisodiyot va prognozlash institutida davlat boshqaruvi magistri darajasini olgan.

Avval Smailov Qozog‘iston bosh vazirining birinchi o‘rinbosari – Qozog‘iston moliya vaziri lavozimida ishlagan, 5-yanvardan Qozog‘iston bosh vaziri vazifasini bajaruvchisi bo‘lgan.