Грузиянинг собиқ президенти Михаил Саакашвили мамлакатни инқироздан чиқаришнинг ягона йўли навбатдан ташқари парламент сайловларини ўтказиш деб ҳисоблашини маълум қилди, деб ёзмоқда «Интерфакс».
«Мазкур оғир инқироздан чиқиш ва мамлакат келажаги учун ягона фойдали қарор иложи борича тезроқ муддатидан илгари парламент сайловларини ўтказиш», – дея ёзган у ижтимоий тармоқларда.
Шунингдек, Саакашвили ўзи асос солган «Ягона миллий ҳаракат» партиясининг ҳудудларда аҳоли билан учрашувларни кўпайтириш, фаоллаштириш, «Миллий сафарбарлик ҳаракати куни»ни жорий этиб, ўн минглаб одамларнинг навбатдан ташқари сайловлар ўтказишни талаб қилиши бўйича таклифларини қўллаб-қувватлашини билдирган.
У сайловолди кампаниясида қатнашишни режалаштиргани ва сайловларда катта устунлик билан ғалаба қозонишига ишонишини таъкидлади.
«Сайловолди кампаниясида мен ҳам иштирок этишим ва одамларни бирлаштиришимизни инобатга олган ҳолда, грузин жамияти сайловларда катта устунлик билан ғалаба қозонади деб ўйлайман. Бу борада аниқ режамиз бор ва бошланган ишни якунига етказамиз», – дея қайд этган Саакашвили.
Грузия собиқ президенти мамлакатга яширин равишда кирган ва Тбилисида 2021 йил 1 октябрда ҳибсга олинганди.
У Грузияда бир нечта жиноят ишларига алоқадорлиги тергов қилинмоқда. Қамоқхонага қайтарилгандан сўнг сиёсатчи тарафдорларига биринчи мурожаатини йўллади. Мурожаатида Саакашвили ҳозир унинг учун «реабилитация»дан кейин ўзини тиклаб, «ҳужум»га тайёргарлик кўриш муҳим эканини айтган.
Саакашвили ўзини ҳибсда ушлаб турилгани ноқонуний ҳаракат эканлиги ва унга нисбатан эълон қилинган айбловлар сохталаштирилган деб ҳисоблаши ҳақида гапирган.
Мавзуга доир: «Миша, биз келдик». Саакашвилининг қайтиши ва қамоққа олиниши қандай қилиб Грузияни иккига бўлиб юборди?
Изоҳ (0)