Ўзбекистонга 2022 йил январь ойида Pfizer-BioNTech вакцинасидан 310 минг доза олиб келиш кўзда тутилган. Бу ҳақда Соғлиқни сақлаш вазирлиги ўтказган матбуот анжуманида Тошкент шаҳар соғлиқни сақлаш бош бошқармаси бошлиғи Анвар Алимов маълум қилди, дея хабар бермоқда «Дарё» мухбири.
Унинг қайд этишича, мамлакатда 2021 йил июнь ойининг иккинчи ярмидан бошлаб касалланиш кўрсаткичлари ўсган.
Июль ойида касаллик аниқланишининг юқори чўққисига чиққан. Август ойининг биринчи ярмида бироз барқарор ҳолат юзага келган. Август ойининг иккинчи ярми ва сентябрь ойидан бошлаб касаллик аниқланишининг пасайиши кузатилгани ҳамда сўнгги бир ҳафта давомида касалланишнинг ошгани қайд этилган.
Ўзбекистонда коронавирус билан кунлик касалланишлар сони 9 январда 389 тани ташкил қилди. Шунингдек, 3 нафар коронавирусга чалинган бемор вафот этиб, касалликдан вафот этганлар сони 1497 нафарни ташкил қилди.
Аввалроқ Ўзбекистонга 500 400 доза Moderna вакцинаси олиб келингани хабар қилинганди. Бу 2022 йил ҳисобидан келтирилган илк вакцина ҳисобланади.
Эслатиб ўтамиз, мамлакатга келган хорижий давлат фуқаросидан COVID-19 нинг янги «омикрон» штамми 2022 йилнинг 7 январь куни аниқланди. Шу сабабли 15 январдан турли тадбирлар ташкил этиш тақиқланди. Шунингдек, эмланмаган ходимлар ишга қўйилмайди.
Изоҳ (0)