Ўзбекистонда 7 январь куни коронавирус инфекциясининг «омикрон» штамми аниқлангани ҳақида 9 январь куни хабар берилганди. Соғлиқни сақлаш вазирлиги ўтказган матбуот анжуманида нега касаллик аниқлангани ҳақида икки кун кечикиб маълум қилингани бўйича тушунтириш берилди, деб хабар бермоқда «Дарё» мухбири.
Қайд этилишича, Санитария-эпидемиологик осойишталик ва жамоат саломатлиги хизмати бошлиғининг биринчи ўринбосари Холмамат Норбоев бу ҳақдаги саволга қуйидагича жавоб берган:
« ‘Омикрон’ штамми аниқлангач, ташхис бўйича дунёнинг етакчи мутахассислари билан маслаҳатлашиш, узоқ текширувлар ўтказиш ва уни тасдиқлаш билан боғлиқ жараёнлар туфайли уни ўз вақтида эълон қилиш имкони бўлмади ва икки кундан сўнг жамоатчиликка маълум қилинди».
Эслатиб ўтамиз, Ўзбекистонда коронавируснинг «омикрон» штамми аниқлангани муносабати билан 15 январдан бошлаб мамлакатда бир қатор чекловлар жорий этилади. Жумладан, турли тадбирлар ташкил этиш тақиқланади, эмланмаган ходимлар ишга қўйилмайди. Олий таълим муассасалари талабалари ўртасида таътил давомида коронавирус инфекциясига қарши тўлиқ эмлаш чоралари кўрилади.
Изоҳ (0)