Бразилия кўлида қоя қулаши оқибатида ҳалок бўлганлар сони 10 кишига етди

Бразилия шарқидаги Фурнаш кўлида қоянинг бир қисми қулаб тушиши оқибатида ҳалок бўлганлар сони ўн нафарга етди, деб хабар бермоқда «РИА Новости».

Олдинроқ саккиз киши ҳалок бўлгани ҳақида хабар берилган. Яна икки киши бедарак йўқолган деб ҳисобланмоқда.

«Сўнгги икки жасад топилди. Бу маълумотни қутқарувчилар ҳам тасдиқлади. Жами 10 киши ҳалок бўлган», — дейилади хабарда.

Минас-Жерайис штатида жойлашган кўлдаги бахтсиз ҳодиса 8 январь куни юз берганди. Ўшанда 30 дан ортиқ сайёҳлар бир нечта туристик қайиқларда кўлдаги шаршарани кўздан кечираётган пайтда қоянинг бир қисми уларнинг устига қулаган.

Штат қутқарув хизмати матбуот котиби Педро Айихаранинг сўзларига кўра, минтақада икки ҳафта давом этган ёғингарчилик кучли эрозияга учраган қояларнинг қулашига сабаб бўлган.

Аввалроқ Туркияда сайёҳлар билан экскурсия уюштираётган қайиқ чўкиб кетганди. Ҳодиса оқибатида 2 ёшли бола ҳалок бўлган.