Бельгия ва Чехияда минглаб одамлар аҳолини мажбурий вакцинация қилиш ва чеклов чораларига қарши норозилик билдириш мақсадида кўчаларга чиқди, деб хабар беради Deutsche Welle.
AFP’нинг маълумотларига кўра, 9 январь куни Брюсселда бир неча минг киши қўлларига мажбурий вакцинацияга қарши плакатларни кўтариб олган ҳолда Европа даҳасига қадар марш юрган. Олдинги акциялардан фарқли ўлароқ, бу сафарги намойиш асосан тинч ўтгани айтилмоқда.
Полициянинг маълум қилишича, намойишларда 5 мингга яқин одам иштирок этган. Уларнинг қарийб 40 нафари қўлга олинган. Намойишчилар асосан ресторанлар, барлар ва маданий тадбирларга кириш учун талаб қилинаётган вакцинация паспортларига қарши норозилик билдирган.
Прагада эса 4 мингга яқин намойишчилар 9 январь куни мажбурий вакцинацияга қарши норозилик билдирди. 8 январь куни 2 мингга яқин одам Брно шаҳрида митингга тўпланган.
Андрей Бабиш бошчилигидаги олдинги ҳукумат Чехиянинг 60 ёшдан катта бўлган барча фуқаросини COVID-19 га қарши мажбурий эмлаш бўйича қарор қабул қилган. У мартдан бошлаб кучга киради. Пётр Фиала раҳбарлигидаги янги Вазирлар Маҳкамаси мажбурий вакцинация бўйича ҳозирча якуний қарор қабул қилмаган.
Аввалроқ Италияда 50 ёшдан ошганлар учун COVID-19 га қарши мажбурий эмлаш жорий қилингани тўғрисида хабар берилганди. Мамлакатда 50 ёшдан ошган ишчилардан эмланганини ёки яқинда COVID-19 дан тузалганини тасдиқловчи тиббий купонларни кўрсатиш талаб қилинади. Акс ҳолда, улар февраль ойининг ўрталарида ишдан четлатилиши мумкин. Бунгача эмланмаган одамлар ҳар икки кунда COVID-19 га топширган тестининг манфий натижасини тақдим этгандагина ишга чиқиши мумкин эди.
Изоҳ (0)