Қирғизистон президенти Садир Жапаров қисқа муддатли таътилга чиқди. Бу ҳақда давлат раҳбарининг матбуот хизматига таяниб, «РИА Новости» хабар берди.
«Қирғизистон Республикаси президенти Садир Жапаров 10 январдан қисқа муддатли таътилга чиқди», — дея маълум қилган матбуот хизмати вакили.
Унинг сўзларига кўра, Қирғизистон раҳбари «мамлакат ва минтақадаги вазият тўғрисида тўлиқ маълумот олишда давом этмоқда, шунингдек, Вазирлар Маҳкамаси ва бошқа давлат органлари раҳбарияти билан доимий алоқада бўлиб турибди».
Садир Жапаровнинг таътилга чиқиши сабаблари ҳақида хабар берилмаган.
КХШТ Коллектив хавфсизлик кенгашининг навбатдан ташқари сессиясида Қирғизистон президентининг ўрнига республика Вазирлар Маҳкамаси раиси Оқилбек Жапаров онлайн тарзда иштирок этган. Сессияда Қозоғистондаги вазият ва уни нормаллаштириш чоралари муҳокама қилинган.
Видеоконференцалоқа форматидаги КХШТ саммити 10 январь, душанба куни бўлиб ўтди.
Аввалроқ Қирғизистон президенти ўз ваколатларини кенгайтиргани ҳақида хабар берилганди.
Изоҳ (0)