Фарғонада 14,5 тонна гўшт маҳсулотларини қўшни республикага ноқонуний равишда олиб ўтишга уринган шахслар аниқланди. Бу ҳақда «Севимли» телеканалининг «Замон» информацион дастурида маълум қилинди.
Фарғона вилояти Божхона бошқармаси Контрабандага қарши курашиш ва божхона аудити бўлими ходимлари томонидан «Андархон» чегара-божхона пости ходимлари билан тезкор тадбир ўтказилган. Тадбир давомида кўмир маҳсулотлари ортилган юк автотранспорт воситаси тезкор кузатувга олиниб, божхона кўригидан ўтказилган.
Кўрик давомида юк ҳужжатларида кўмир кўрсатилган бўлса-да, улар остига умумий қиймати 270 миллион сўмлик гўшт борлиги аниқланган.
«Бағдоддан гўштни, Фарғонадан эса кўмирни юкладим», — дейди ҳайдовчилардан бири.
Яна бир ҳайдовчининг сўзларига кўра, тожикистонлик мижози шу гўштларни сотмаса, банкрот бўлишини айтгани сабаб шу ишга аралашган.
Ҳолат юзасидан божхона органлари томонидан терговга қадар текширув ҳаракатлари олиб борилмоқда.
Аввалроқ Тошкентдаги «Авиасозлар» бозорида истеъмолга яроқсиз гўшт аниқлангани, Қаршида Nexia юкхонасида 250 килога яқин истеъмолга яроқсиз гўшт олиб кетилаётгани аниқланиб, йўқ қилингани, Тошкентдан Хоразмга олиб кетилаётган 1 тоннага яқин истеъмолга яроқсиз гўшт тўхтатиб қолингани тўғрисида хабар берилганди.
Мавзуга доир:
- Наманганда Lacetti юкхонасида 150 кило истеъмолга яроқсиз гўшт олиб кетилаётгани аниқланди
- Жиззахда истеъмолга яроқсиз гўшт маҳсулотларини Тошкент вилоятига жўнатиш билан шуғулланган шахслар жаримага тортилди
- Навоийда 160 кг гўшт ветеринария-санитария талабларига зид равишда Тошкентга олиб кетилаётгани аниқланди
Изоҳ (0)