Мексика ташқи ишлар вазири Марсело Эбрард АҚШ ҳукуматига ғарбий яримшарда Европа Иттифоқига ўхшаш ташкилот тузиш имкониятини кўриб чиқишни таклиф қилди, деб хабар беради «Коммерсантъ». У 35 та давлат аъзо бўлган Америка давлатлари ташкилотини эскирган деб ҳисобламоқда.
«Мексика АҚШга Европа Иттифоқига ўхшаш ташкилотни тузиш учун ҳаракатланишни таклиф қилди. Америка давлатлари ташкилоти жуда эскириб кетди. Шу сабабли бошқа нарса тузиш таклиф этилди, аммо бу Лотин Америкаси ва Кариб ҳавзаси мамлакатларининг биргаликда кўрсатадиган кучига боғлиқ. Агар бирдам бўлсак, буни уддалаймиз», — дейди мексикалик дипломат.
Таъкидланишича, Мексика томонидан бундай таклиф биринчи бор берилмаяпти. 2021 йилнинг июлида Мексика президенти Андрес Мануэль Лопес Обратор Лотин Америкаси ва Кариб ҳавзаси мамлакатларининг ТИВ раҳбарлари иштирокида ўтказилган саммитда Европа Иттифоқига ўхшаш минтақавий иттифоқни тузиш имкониятини кўриб чиқиш таклифини билдирганди.
Эслатиб ўтамиз, 2021 йилнинг мартида АҚШ президенти Жо Байден ва Мексика президенти Андрес Мануэль Лопес Обрадор виртуал тарзда бўлиб ўтган учрашувда миграция соҳасида ҳамда ўзаро ва минтақавий ривожланишга кўмаклашиш бўйича биргаликдаги саъй-ҳаракатларни илгари суриш бўйича ҳамкорлик қилишга келишиб олган эди.
Изоҳ (0)