Туркманистонда февраль бошида Миллий кенгаш Халқ маслаҳати палатасининг навбатдан ташқари йиғилиши бўлиб ўтади. Бу ҳақда «Turkmenportal» хабар берди.
Маълум қилинишича, йиғилишда Туркманистоннинг кейинги 30 йилга мўлжалланган тараққиёт дастури тасдиқланди, шунингдек, 2021 йил якунлари сарҳисоб қилинади ва жорий йилдаги вазифалар белгилаб олинади.
Халқ маслаҳатининг навбатдан ташқари йиғилишини ўтказишга боғлиқ барча ишларни мувофиқлаштириш Вазирлар Маҳкамаси раиси ўринбосари Сердар Бердимуҳамедов, Миллий мажлис раиси Гулшат Маммедова ва Халқ кенгаши раиси ўринбосари Қасимгул Бабаевга юклатилган.
Туркманистон раҳбари мамлакатнинг мустақил тараққиёт йилларида босиб ўтган йўли, шунингдек, унинг кейинги ўттиз йиллик стратегик йўналишини белгилаб бериш муҳимлигини таъкидлар экан, «Биз давлатимиз тақдири ва келажак авлодлар учун катта масъулиятни кўтариб юрибмиз», деган.
Эслатиб ўтамиз, Туркманистонда 2021 йил 28 март куни биринчи марта парламентнинг юқори палатаси — Халқ маслаҳати учун сайловлар бўлиб ўтганди.
Маълумот учун, мамлакат ҳаётига бағишланган «Буюк ютуқлар хроникаси»нинг 2019 йилда чоп этилган 13-томида Халқ маслаҳати йиғилиши (ўша пайтда у маслаҳатчи орган эди)да икки палатали парламент яратишнинг таклиф қилиниши йилнинг асосий ҳодисаси дея қайд этилган. 2021 йилда Туркманистонда икки палатали тизим жорий қилинган.
Изоҳ (0)