Ўзбекистон йўлларида сўнгги кунларда содир бўлган бахтсиз ҳодисалар тафсилотларини тақдим этамиз.
Қаршида олиб қочилган Lacetti бетон тўсиққа урилди.
2022 йил 1 январь куни соат 02:00 ларда Қарши шаҳар 102 рақамига Косон тумани Пўлати шаҳарчасида яшовчи 34 ёшли Б.И. қўнғироқ қилган.
Аниқланишича, Б.И. Cobalt’ини Қарши шаҳридаги Б.Шерқулов кўчасида қолдирган. Ва шу кўчада жойлашган «Нармен» тунги клубига кириб кетганидан сўнг номаълум шахс автомашинасини олиб қочгани тўғрисида хабар берган.
Б.И. автомашинани топишда ҳамда транспорт воситасини олиб қочган шахсга нисбатан қонуний чора кўришни сўраган.
Олиб борилган тергов-тезкор ҳаракатлари натижасида, ушбу транспорт воситаси Қарши шаҳар Зарин кўчасида яшовчи 49 ёшли Б.Д. томонидан олиб кетилгани, Б.Д. автомашинани маст ҳолатда бошқариб Қарши шаҳар И.Каримов кўчасидаги бетон тўсиққа урилиб, йўл транспорт ҳодисасини содир этгани аниқланган.
Мазкур ҳолат юзасидан Қарши шаҳар ИИО ФМБ ҳузуридаги Тергов бўлими томонидан Б.Д.га нисбатан Жиноят кодексининг 267-моддаси 1-қисми (транспорт воситасини олиб қочиш) билан жиноят иши қўзғатилиб, процессуал тартибида ушланган.
Ҳозирда тергов ҳаракатлари олиб борилмоқда.
Юк машинаси билан тўқнашган Nexia ёниб кетди.
5 январь куни соат 13:52 да Жиззах вилояти Фавқулодда вазиятлар бошқармасига 101 қисқа рақами орқали М-39 Алмати–Тошкент–Термиз халқаро автомобиль йўлининг Жиззах вилояти Дўстлик тумани ҳудудидан ўтувчи 942-километрида енгил автомобиль ёнаётгани тўғрисида маълумот келиб тушди.
Айтилган жойга Дўстлик тумани ФВБдан қутқарувчилар бўлинмаси юборилган. Шунингдек, ёнғин жойига Сирдарё вилояти Сардоба тумани ФВБ 8-сонли ёнғин-қутқарув қисмидан ҳам 1 та бўлинма етиб келган. Кўрилган тезкор чора-тадбирлар натижасида ёнғин тўлиқ бартараф этилган. Жабрланганлар йўқ.
Аниқланишича, Тошкент–Термиз йўналишида ҳаракатланиб кетаётган Nexia’нинг шу йўналишдаги юк автомобили билан тўқнашуви оқибатида бетон тўсиққа бориб урилган ва ёнғин келиб чиққан.
Ҳодиса оқибатида ҳеч ким жабрланмаган. Кўрилган моддий зарар миқдори аниқланмоқда.
Orlando Lacetti устига «чиқиб олди».
Дастлабки маълумотларга кўра, 2021 йилнинг 5 январь куни соат 13:00 ларда, Тошкент шаҳар, Олмазор тумани ҳудудида жойлашган «Олмазор» тўйхонаси рўпарасида ҳайдовчи Р.И. (1981 йилда туғилган) бошқарувидаги Orlando ҳамда ҳайдовчи А.Х. (2002 йилда туғилган) бошқарувидаги Lacetti автомобиллари иштирокида тўқнашув содир бўлган.
Ҳодиса натижасида тан жароҳати олган фуқаролар йўқ.
Мазкур ЙТҲ юзасидан Тошкент шаҳар ИИББ ЙҲХБ ходимлари томонидан суриштирув олиб борилмоқда.
Captiva пиёда ва велосипедчини уриб кетди.
Фарғона вилояти Ўзбекистон туманидан ўтувчи 4Р-154 Қўқон–Яйпан–Исфара йўлининг 20-километрида Captiva ёнида кетаётган йўловчига чалғиб бошқарувни йўқотади. Шу сабаб йўл четида турган велосипедчи ва пиёдани уриб кетади.
Оқибатда велосипедчи оғир тан жароҳати олиб шифохонада вафот этган, пиёда шифохонада даволанмоқда.
Ҳайдовчига нисбатан Жиноят кодексининг 266-моддаси 2-қисми (одам ўлимига сабаб бўлган транспорт бошқариш хавфсизлиги қоидаларини бузиш) билан жиноий иш қўзғатилган.
Изоҳ (0)