АҚШ, Россия, Хитой, Буюк Британия ва Франция ядровий уруш ва қуролланиш пойгасига йўл қўймасликни назарда тутувчи қўшма баёнотни эълон қилди. Бу ҳақда Оқ уй ва Кремль сайтлари орқали хабар берилган.
«Хитой, Франция, Россия, Буюк Британия ва АҚШ ядро қуролларига эга давлатлар ўртасида уруш бўлишидан қочиш ва стратегик хатарларни камайтириш асосий мажбуриятмиз бўлиши керак деб ҳисоблайди», — дейилади баёнотда.
Таъкидланишича, «ядро урушида ғалаба қозониб бўлмайди ва уни ҳеч қачон бошламаслик керак». Шунингдек, қайд этилишича, ядро қуролидан фойдаланиш кенг миқёсли оқибатларга олиб келиши сабабли, улар мудофаа мақсадларига хизмат қилиши, тажовуз ва урушнинг олдини олиши керак.
Баёнот иштирокчилари бу каби қуролнинг тарқалишини тўхтатиш зарурлигига «ишончлари комил».
Имзоланган баёнотда, шунингдек, барча давлатлар билан хавфсизлик, қуролсизланиш бўйича тараққиёт ва ядровий қуролдан холи бўлган хавфсиз дунё учун ҳамкорлик қилиш мажбурияти яна бир бор тасдиқлайди.
Бундан ташқари, баёнотда ўзаро тушуниш даражасини ошириш ва «ҳеч кимга фойда келтирмайдиган ва ҳамма учун хавф туғдирадиган» қуролланиш пойгасининг олдини олиш нияти ҳам қайд этилган.
Ўз навбатида БМТ бош котиби Антонио Гуттериш «ядровий бешлик» давлатларининг баёнотини олқишлаган. БМТ бош котибининг вакили Стефан Дюжаррикнинг таъкидлашича, Гуттериш «ядровий кучлар томонидан ўзларининг кўп томонлама ҳамда икки томонлама қуролларни тарқатмаслик, қуролсизланиш ва қуролларни назорат қилиш бўйича мажбуриятларига риоя қилиш зарурлигини тан олишларини қадрлайди».
Эслатиб ўтамиз, 2017 йилда БМТ ядро қуролини тақиқлаш тўғрисидаги конвенцияни қабул қилганди.Ўшанда АҚШ, Буюк Британия ва Франция ҳужжатни имзолаш ёки ратификация қилиш ниятида эмасликларини маълум қилганди.
Изоҳ (0)