Тошкент шаҳри Яшнобод туманида 1 январь куни учта машина иштирокида йўл-транспорт ҳодисаси содир бўлди. Бу ҳақда шаҳар Ички ишлар бош бошқармаси хабар қилди.
Маълум қилинишича, ЙТҲ шу куни соат 17:15 атрофида Махтумқули кўчасида содир бўлган. Спиртли ичимлик таъсирида бўлган Matiz ҳайдовчиси С.Н. (1967 йилда туғилган) бошқарувни йўқотиб, қарама-қарши йўналиш бўйлаб ҳаракатланиб келаётган Э.Р. (1991 йилда туғилган)га тегишли Nexia-2 ва Р.К. (1983 йилда туғилган)нинг Nexia-2 автомобиллари билан тўқнашиб кетган.
Оқибатда 7 нафар фуқаро тан жароҳати олган. Булар:
- ҳайдовчи Р.К. — бош мия ёпиқ жароҳати, БМЧ, чап болдир суягининг ёпиқ синиши, оёқнинг тўпиқ қисми ёпиқ синиши ташхиси билан;
- вояга етмаган 7-синф ўқувчиси З.Т. (2009 йилда туғилган) — бош мия ёпиқ жароҳати, БМЧ ташхиси билан;
- вояга етмаган 2-синф ўқувчиси Ф.К. (2012 йилда туғилган) — пешона тери қисми йиртилган жароҳати, бош мия ёпиқ жароҳати, БМЧ ташхиси билан;
- вояга етмаган боғча тарбияланувчиси И.К. (2017 йилда туғилган) — бошнинг юқори қисмининг йиртилган жароҳати, бош мия ёпиқ жароҳати, БМЧ, чап оёқ болдир суяги ёпиқ синиши ташхиси билан;
- вояга етмаган О.К. исмли чақалоқ (2021 йилда туғилган) — травматик шок ташхиси билан;
- йўловчи Ф.К. (1987 йилда туғилган) — чап оёқ очиқ синиб силжиши ташхиси билан;
- Matiz ҳайдовчиси С.Н. — бош мия ёпиқ жароҳати, БМЧ, ўнг болдир суягининг очиқ синиб силжиши, кўплаб шилинмалар, мастлик ҳолати ташхиси билан.
Ҳолат юзасидан Жиноят кодексининг 266-моддаси (транспорт воситалари ҳаракати ёки улардан фойдаланиш хавфсизлиги қоидаларини бузиш) 1-қисми билан жиноят иши қўзғатилган.
Ҳозирда тергов ҳаракатлари олиб борилмоқда.
Изоҳ (0)