Жанубий Африка репсубликаси пойтахти Кейптаунда жойлашган мамлакат парламенти биносида ёнғин содир бўлди. Бу ҳақда шаҳар мерияси расмий маълумот берган, деб ёзмоқда Times Live.
Парламент биноси олов ичида қолган ва аланга бинонинг том қисмига ҳам ўтган, дея маълум қилган мериянинг хавфсизлик ва қўриқлаш қўмитаси аъзоси Жей Пи Смит.
«Ҳозирча ёнғин тўлиқ бартараф этилгани йўқ, бино деворларида ёриқлар пайдо бўлгани ҳақидаги ахборот ҳам расман тасдиғини топди», — деган у газетага интервью берган вақтида.
Смитнинг аниқлик киритишича ёнғин ҳақидаги маълумот 2 январь куни маҳаллий вақт билан 05:00 (Тошкент вақти билан 08:00) келиб тушган. Дастлабки ахборотга кўра ёнғин учинчи қаватдаги офис хоналарида бошланган, кейин аланга спорт зали томонга ҳаракатланган.
Оловни ўчиришга 36 нафар ўт ўчирувчи сафарбар этилган, бироқ улар қўшимча ёрдам кучлари келишини сўраган. Ҳалок бўлганлар ёки жароҳатланганлар ҳақида маълумот келиб тушмаган.
Шаҳар маъмурияти ҳам фавқулодда вазиятлар хизматларининг расмийлари ҳам ҳозирча ёнғиннинг келиб чиқиш сабаблари ҳақида маълумот бермаган, дея ёзган AFP.
ЖАР парламенти Кейптаундаги қонун чиқарувчи орган ҳисобланади. Парламент икки палата: Провинциялар миллий кенгаши (юқори палата) ҳамда Миллий ассамблеядан (қуйи палата) иборат.
Жанубий Африка республикаси парламенти мажмуаси уч бинода фаолият олиб боради. Комплекснинг энг кекса биноси 1884 йилда қурилган, янги бинолар эса 1920–1980 йиллар оралиғида бунёд этилган (айнан шу биноларда Миллий кенгаш фаолияти ташкил қилинади).
Изоҳ (0)