Австрия собиқ канцлери Себастьян Курц америкалик миллиардер Питер Тилнинг компаниясида ишлайди

Австриянинг собиқ канцлери Себастьян Курц америкалик тадбиркор Питер Тиль томонидан асос солинган Thiel Capital инвестиция фирмасида глобал стратег бўлиб ишлайди. Бу ҳақда у OE24 телеканалига маълум қилган.

Телеканал маълумотларига кўра, экспертлар Курцнинг келажакдаги йиллик даромадини 500 минг еврога баҳоламоқда — бу унинг канцлер сифатида олган йиллик даромадидан тахминан 190 минг еврога кўп.

Bloomberg компанияга яқин манбасига таяниб ёзишича, собиқ канцлер компанияда Европа Иттифоқи ва Австрия сиёсати бўйича маслаҳатчи бўлиб ишлайди.

Курц ва Тиль 2017 йилда Мюнхен хавфсизлик конференциясида танишган.

Аввалроқ Österreich газетаси Курцнинг атрофидаги манбаларга таяниб, 2022 йилда у АҚШдаги хусусий компанияда йилига 500 минг евро эвазига ишлай бошлаши ҳақида хабар берганди. Kronen Zeitung газетаси эса собиқ канцлер Кремний водийсидаги компаниялардан бирида февраль ойида менежер сифатида вазифасига киришишини ёзган.

Курц 2017 йилнинг декабрида Австрия канцлери бўлганди. Ўшанда у 31 ёшда эди ва Европадаги энг ёш ҳукумат раҳбарига айланган. 2019 йилнинг май ойида унинг ҳукумати сиёсий можаро фонида ишончсизлик вотумини олган ва канцлер истеъфога чиққан, бироқ навбатдан ташқари парламент сайловларидан кейин у лавозимига қайтган.

2021 йилнинг октябрь ойида Курц коррупция можароси туфайли бутунлай истеъфога чиқди. Тергов Курц ва унинг энг яқин шерикларини коррупция ва ишончни суиистеъмол қилишда айблади. Канцлернинг атрофидаги одамлар Österreich газетасига пора бериб, Австрия халқ партияси ҳақида ижобий фикрлардан иборат сўровномалар ҳақида ёзишни сўраганликда гумон қилинди. Тергов версиясига кўра, мансабни суиистеъмол қилиш 2016—2018 йилларда амалга оширилган. Мамлакат Молия вазирлиги нашрдаги реклама эълонларини молиялаштириш учун бюджет маблағларидан фойдаланиб, эвазига у ерга материал жойлаштиришни талаб қилгани айтилди.

Курцнинг ўзи бу айбловларни рад этди ва канцлер лавозимида қолишини айтди, бироқ 9 октябрь куни «тартибсизликнинг олдини олиш ва барқарорликни таъминлаш» учун ўз лавозимини тарк этаётганини эълон қилди. 2 декабрь куни эса собиқ канцлер сиёсатдан бутунлай кетаётганини маълум қилди.

Питер Тиль — асли немис миллатига мансуб америкалик миллиардер, PayPal асосчиларидан бири, венчур инвестор.