Қисман тан олинган Косово ҳукумати республикадаги муваққат маъмурият ишлари бўйича БМТ миссиясининг россиялик ходимини persona non grata (хуш кўрилмаган инсон) деб эълон қилди. Бу ҳақда республика ташқи ишлар вазири Доника Гервалла Facebook’да ёзиб қолдирган.
Қайд этилишича, исми ва лавозими ошкор этилмаган россиялик дипломат Косово бош вазири Альбин Курти илтимосига кўра, республика миллий хавфсизлигига таҳдид солувчи ғаразли ҳаракатлари учун мамлакатдан чиқариб юборилади.
Гервалла, шунингдек, республика Россиянинг минтақадаги беқарорлаштирувчи ҳаракатларига барҳам бериш учун халқаро иттифоқчилар, биринчи навбатда, АҚШ, Европа Иттифоқи ва НАТО билан янада яқинроқ ҳамкорлик қилишда давом этишига ваъда берди.
Россиянинг Сербиядаги элчихонаси Косова расмийларининг дипломатни чиқариб юбориш қарорини «ғарб менторларидан қутилиш мақсадида Россия ва БМТга қарши амалга оширилган навбатдаги провокация» деб атади.
Аввалроқ Россия Эстония консулини persona non grata деб эълон қилгани, Саудия Арабистони ва Баҳрайн Ливан элчиларига мамлакатдан чиқиб кетиши учун 48 соат муҳлат бергани ҳақида хабар берилганди.
Изоҳ (0)