Чеченистон раҳбари Рамзан Қодиров ҳамда унинг ота-онаси Аҳмад ва Аймани Қодировлар республикада хизмат кўрсатган ҳуқуқ ҳимоячилари, деб эълон қилинди.
Қодировлар оиласини «Чеченистонда хизмат кўрсатган ҳуқуқ ҳимоячиси» медали билан тақдирлаш тўғрисидаги буйруқни ҳудуддаги инсон ҳуқуқлари бўйича омбудсмани Нурди Нуҳажиев имзолади, дея хабар берган «Грозний» телеканали.
Омбудсман Қодировларнинг «инсон ҳуқуқларини таъминлаш, давлатчиликни мустаҳкамлаш, фуқароларнинг ижтимоий-иқтисодий ҳуқуқларини рўёбга чиқариш, ҳар бир инсон ва жамият фаровонлигини ошириш учун шарт-шароит яратишга, шунингдек, кенг кўламли инсонпарварлик ёрдами ва хайрияларга қўшган улкан ҳиссасини» қайд этган.
Эслатиб ўтамиз, аввалроқ Рамзан Қодировнинг тўнғич қизи, Чеченистон маданият вазири лавозимини эгаллаб турган 23 ёшли Айшат «Республикада хизмат кўрсатган маданият ходими» унвони ва «Инсон ҳуқуқларини ҳимоя қилгани учун» медали билан тақдирланган эди.
Декабрь ўрталарида Қодиров яна бир қизи, Грозний шаҳри мактабгача таълим департаменти бошлиғи Хадижат Қодировани «Чеченистон Республикаси олдидаги хизматлари учун» медали билан тақдирлаган.
Сентябрь ойида Россия президенти Владимир Путин Рамзан Қодировни III даражали «Ватан олдидаги хизматлари учун» ордени билан тақдирлаган эди. Август ойида эса Путин Грозний халқаро аэропортига Рамзан Қодировнинг отаси, Чеченистон биринчи президенти Аҳмад Қодиров номини берганди.
Изоҳ (0)