Сирдарё вилояти ҳокимлигининг 477,9 миллион сўмга Kia Sorento Comfort хизмат автомобили хариди бўйича шартномаси бекор қилиниб, маблағлар «Саховат ва кўмак» жамғармасига йўналтирилди. Бу ҳақда вилоят ҳокимлиги матбуот хизмати хабар берди.
21 декабрида вилоят ҳокимлиги ҳамда Тошкент шаҳридаги Киа автомобилларини етказиб берувчи автосалон ўртасида тузилган шартномага кўра, ҳокимлик 477,9 миллион сўмга Kia Sorento Comfort автомобилини харид қилган эди.
«Мазкур ҳолат ижтимоий тармоқларда муҳокамаларга сабаб бўлиб, тармоқ фаоллари ўз қарашларини баён этди. Кенг жамоатчиликнинг фикр-мулоҳазаларини инобатга олган ҳолда ҳокимлик ҳамда автомобиль етказиб берувчи автосалон ўртасида тузилган шартнома бекор қилинди», — дейилади хабарда.
Маълум қилинишича, мазкур маблағлар маҳаллий бюджетга тикланган ҳолда вилоятдаги эҳтиёжманд, ижтимоий ёрдамга муҳтож, ногиронлиги бор, боқувчисини йўқотган оилаларни янада қўллаб-қувватлаш учун «Саховат ва кўмак» жамғармасига йўналтирилган.
Ушбу ҳолат бўйича Сирдарё вилояти маҳаллий бюджети маблағларини ишлатилишини ҳамда давлат харидлари тўғрисидаги талабларни етарли назорат қилмагани учун Сирдарё вилояти ҳокимининг молия-иқтисодиёт ва камбағалликни қисқартириш масалалари бўйича биринчи ўринбосари Анвар Каримовга «ҳайфсан» интизомий жазо чораси қўлланилган.
Вазирлар Маҳкамасининг 2021 йил 29 апрелдаги 258-сон қарори билан «Давлат бошқаруви ва маҳаллий давлат ҳокимияти органларида хизмат автотранспорт воситаларини бириктириш меъёрлари» тасдиқланган. Унга кўра, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликларининг хизмат машиналари нархлари БҲМнинг 2000 бараваридан (540 миллион сўм), двигатель энг юқори қуввати 4000 сантиметр/кубдан ошмаслиги белгиланган.
Аввалроқ Тошкент вилояти ҳокимлиги ҳоким ўринбосарлари учун Malibu ва Tracker сотиб олгани, Сурхондарё ҳокимлиги қарийб 700 млн сўмга иккита Skoda Kodiaq харид қилгани тўғрисида хабар берилганди.
Изоҳ (0)