Россиянинг Ленинград вилоятида устига бетон плита тушиб кетган ўзбекистонлик ишчи шифохонага ётқизилди. Бу ҳақда «Невские Новости» нашри ҳуқуқ-тартибот органларидаги манбасига таяниб, маълум қилди.
Кўнгилсиз ҳодиса 27 декабрь куни маҳаллий вақт билан соат 20:00 ларда Лаврики шоссесида содир бўлган. 25 ёшли жабрланувчининг сўзларига кўра, уни плита босиб қолган. Ўзбекистон фуқароси бўлган ушбу шахс оғир аҳволда реанимацияга жойлаштирилган.
Шифокорлар унга бош мия чайқалиши, ёпиқ бош мия травмаси, қовурға синиши, пневмоторакс, бош, иякда кўкариш ва жароҳат ташхисини қўйган.
Эслатиб ўтамиз, 2019 йилнинг сентябрида Ленинград вилоятининг Всеволожск туманидаги қурилиш майдончасида 35 ёшли Ўзбекистон фуқароси баландликдан қулаш оқибатида ҳалок бўлганди. 2021 йилнинг июнида ҳам ушбу вилоятдаги қурилиш майдонида 22 ёшли Ўзбекистон фуқароси баландликдан қулаб, вафот этган эди.
Изоҳ (0)