Ҳукумат қарори билан Ўзбекистон фуқароларини доимий яшаш жойи ва вақтинча турган жойи бўйича рўйхатга олиш тартиби тўғрисидаги низомга ўзгартириш ва қўшимчалар киритилди, деб хабар беради «Ҳуқуқий ахборот» канали.
Фуқароларни доимий яшаш жойи бўйича рўйхатга олиш, бекор қилиш ва вақтинча турган жойи бўйича рўйхатга олиш хизматлари миграция ва фуқароликни расмийлаштириш бўлинмалари, давлат хизматлари марказлари ёки Ягона ижтимоий давлат хизматлари портали орқали амалга оширилади.
Маълум қилинишича, рўйхатга олиш учун тақдим қилинадиган ҳужжатлар рўйхатидан уй-жой ҳужжатлари чиқариб ташланган. Доимий рўйхатга олиш расмийлаштирилганда QR-код билан ҳимояланган қайд варағи берилади.
Фуқаронинг доимий рўйхатга олинишини бекор қилиш асослари белгиланди:
- бир манзилдан бошқа манзилга рўйхатга олинганда;
- мулкдор аризасига кўра;
- мулкдор ўзгарганда;
- суднинг фуқарони уй-жойдан фойдаланиш ҳуқуқини йўқотган, шасхни бедарак йўқолган деб топиш ва кўчириш ҳақидаги қарори асосида;
- фуқаро хорижга доимий яшашга кетганида;
- сохта ҳужжатлар асосида рўйхатга олинганлик аниқланганда;
- умрбод озодликдан маҳрум этилганда;
- вафот этганда.
Эслатиб ўтамиз, 2020 йил 21 апрелда Шавкат Мирзиёев Тошкент шаҳри ва вилоятига доимий прописка қилишни соддалаштириш ҳақидаги фармонни имзолаган. 29 апрелда эса Қонунчилик палатаси депутатлари прописка тизимини ислоҳ қилиш тўғрисидаги қонунни маъқуллаган, 12 май куни сенаторлар прописка тизимига киритиладиган ўзгаришларни маъқуллаган. Шавкат Мирзиёев мазкур қонунни 13 май куни имзолади.
Шунингдек, Президент томонидан 20 майда имзоланган « ‘Давлат божи тўғрисидаъги қонунга ўзгартириш ва қўшимчалар киритиш ҳақида»ги қонунга мувофиқ, Ўзбекистонда доимий яшовчи ва республиканинг бошқа минтақаларида доимий пропискага эга бўлган Ўзбекистон фуқаролари томонидан Тошкент шаҳри ва Тошкент вилоятида янги қурилган кўчмас мулк сотиб олинганда мол-мулкнинг олди-сотди шартномаларини тасдиқлаганлик учун шартнома суммасининг 5 фоизи миқдордаги давлат божининг алоҳида ставкаси бекор қилинган.
Изоҳ (0)