Тарих фанлари номзоди, таниқли тарихчи олима ва археолог Маргарита Филановичнинг таъкидлашича, Тошкент шаҳар ҳокимлиги 2021 йилда пойтахтдаги машҳур Шоштепа ёдгорлигини таъмирлашни ваъда қилган бўлса-да, ишлар ҳали ҳам бошланмаган. Бу ҳақда «Podrobno.uz» хабар қилди.
Филанович Шоштепа ёдгорлигини тадқиқ қилиб, Тошкентнинг ёши 2200 да эканини аниқлаган ва унинг кашфиёти Ўзбекистон пойтахти юбилейини нишонлашга асос бўлиб хизмат қилганди.
«Шоштепа, Мингўрик, Оқтепа. Бу ёдгорликларни қутқариш, реконструкция ва муҳофаза қилиш керак. Шоштепа ёдгорлигининг ярми ноқонуний қурилаётган уй-жойларнинг тебраниши туфайли қулаб тушди ва вайронгарчилик давом этмоқда. Ҳоким ваъда берганди, яъни консервация бўлади, ёдгорлик чегараланади, деб айтганди. Биз лойиҳани тайёрладик, у кўп марта кўрилиб, имзоланди. Ноябрь ойида менга лойиҳа учун техник вазифани олиб келишди. Лойиҳа 2021 йилда бошланиб, шу йилда тугаши керак эди. Аммо декабрь ойи ҳам келибдики, ишлар бошлангани йўқ», — дейди Маргарита Филанович.
Эксперт ёдгорлик қишда яна қор ва ёмғир остида қолишидан огоҳлантирган: «Бу илм-фан ва жамоатчилик нуқтаи назаридан жиноятдир. Нима қилиш керак ўзи?!»
Қайд этилишича, лойиҳа амалга ошириши керак бўлган корхонада тегишли лицензия мавжуд эмас.
«Ҳеч қайси пойтахтда 2000—2200 йиллик ёдгорлик йўқ. Бу ерда эса ‘столба’ ўрнатиш учун тешиклар қазишади, болалар картошка пиширади!», — дея сўзларини якунлаган Филанович.
Изоҳ (0)