Germaniya hukumati 31-dekabrga qadar mamlakatdagi so‘nggi oltita atom reaktoridan uchtasining ishini to‘xtatmoqchi. Bu haqda The National nashri xabar berdi.
Nashrning yozishicha, hukumat Brokdorf, Grond va Gundremmingen stansiyalari 31-dekabrga qadar energiya tarmog‘idan uzilishini tasdiqlagan. Vitse-kansler Robert Xabek xalqni Yevropaning eng yirik iqtisodiyoti qit’adagi energetika inqirozi sharoitida atom stansiyalarining ishini to‘xtatayotganiga qaramay, energiya taqchilligi bo‘lmasligiga ishontirdi.
Iqtisodiyot va iqlim o‘zgarishi vaziri sifatida toza energiya inqilobiga mas’ul bo‘lgan Xabekning ta’kidlashicha, yashil energiyaga o‘tish barqaror o‘sishda markaziy ahamiyat kasb etadi.
“Germaniya juda muammoli texnologiya ostida chiziq tortmoqda. Atom energetikasidan voz kechish mamlakatimizni xavfsizroq qiladi va radioaktiv chiqindilarning oldini olishga yordam beradi”, — dedi atrof-muhit vaziri Shteffi Lemke atom stansiyalarining shu haftada yopilishi haqida gapirar ekan.
Tanqidchilarning fikricha, yadro energetikasidan voz kechish Germaniyani eng zararli qazilma yoqilg‘isi hisoblangan va uchinchi chorakda Germaniya elektr energiyasining qariyb uchdan bir qismini ta’minlagan ko‘mirga qaramligini oshiradi. Bu Germaniyani Sharqiy Yevropaning Polsha va Chexiya kabi sanoati rivojlangan mamlakatlari qatorida mintaqadagi eng yirik ko‘mir iste’molchilaridan biriga aylantiradi.
Qayta tiklanadigan energiya islohotini amalga oshiruvchi Xabek rejasiga muvofiq holda Berlin hukumati ko‘mirda ishlaydigan elektr stansiyalarining yopilishini 2030-yilga qoldirishga umid qilmoqda. Rejada yangi binolarning tomiga quyosh panellarini o‘rnatish va Germaniya yer maydonining 2 foizidan shamol stansiyalari uchun foydalanish nazarda tutilgan.
Qayd etilishicha, Germaniyada qolgan uchta atom reaktori 2022-yilda yopiladi.
Butun dunyo mamlakatlari qazib olinadigan yoqilg‘idan toza energiya manbalariga o‘tayotgan bir paytda, yadroviy muammolar Yevropani ajratib qo‘yishda davom etmoqda. Yanvar oyida Yevropa Komissiyasi yashil energiya tasnifi ro‘yxatini taqdim etadi, unda uglerod neytralligi majburiyatlari bo‘yicha qaysi manbalar sarmoyaga munosib ekani ko‘rsatilgan bo‘ladi.
Avvalroq Belgiya hukumati 2025-yilga qadar mamlakatdagi barcha atom elektrostansiyalari yopilishini ma’lum qilgandi.
Izoh (0)