АҚШнинг Аляска штати тарихида декабрнинг энг иссиқ куни кузатилди. BBC хабарига кўра, 26 декабрь куни Кодиак оролида ҳарорат рекорд кўрсаткич — Цельсий бўйича 19,4 даражага кўтарилган.
Бу кўрсаткич штатда аввалги йилларнинг шу кунида кузатилган максимал ҳароратдан 7 даражага юқори. Шу билан бирга штатнинг бошқа ҳудудларида рекорд даражадаги паст ҳароратлар кузатилмоқда. Хусусан, Кетчикан шаҳрида 25 декабрь куни ҳаво ҳарорати минус 18 даражагача пасайган.
Мутахассисларнинг таъкидлашича, Гавайи оролларидан келган илиқ ҳаво оқими одатда декабрда совуқ ва қуруқ бўладиган Аляска ҳавосини намлантирган. Кучли қор ёғиши ортидан кучли ёмғир ёғиб, минтақани муз қоплади, чунки сув тезда музлаб қолган. Бу эса электр энергиясида катта узилишларга ва йўлларнинг ёпилишига олиб келди. Йўллардаги муз март ёки апрелгача эримаслиги мумкин, дейилади хабарда.
Аввалроқ Гренландиянинг энг юқори нуқтасида 7 соат ёмғир ёғганди. Бу кузатувлар тарихидаги биринчи ёмғир экани қайд этилган. Шунингдек, Буюк Британияда «арвоҳ камалак» ҳосил бўлгани, Канадада кўл юзасини ғаройиб музли шарчалар қоплагани ҳақида хабар берилганди.
Изоҳ (0)