Alyaskada yuz bergan 8,2 magnitudali zilzila so‘nggi 50 yil ichidagi eng kuchlisi deb tan olindi (video)

Alyaska qirg‘oqbo‘yi hududlarida 29-iyul, payshanba kuni yuz bergan zilzila Shimoliy Amerikada 1964-yildan buyon qayd etilgan eng kuchlisi bo‘ldi, deb yozadi “RIA Novosti”.

Yer yuzasidagi tebranishlar ushbu qit’ada so‘nggi 57 yil ichidagi eng kuchlisiga aylandi. AQSh Geologiya xizmati aniqlik kiritishicha, yerosti silkinishlari magnitudasi 8,2 ga yetgan. Undan keyin ko‘plab aftershoklar sodir bo‘lgan.

“2021-yil 29-iyul kuni (mahalliy vaqt bilan 28-iyul) Alyaskaning Perrivill manzilgohidan janubi-sharqda 8,2 magnitudali zilzila yuz berdi, bu Tinch okeani va shimoliy mintaqalar o‘rtasidagi subduksiya zonasi chegarasida yoki uning yaqinida yorilib surilish natijasida sodir bo‘ldi”, — deyiladi xabarda.

Zilziladan keyin Alyaska hamda Aleut orollari qirg‘oqlari uchun sunami xavfi e’lon qilingan edi, keyinroq esa u bekor qilindi.

Shimoliy Amerika hududida eng kuchli zilzila 1964-yil Ehtirosli juma kuni yuz bergan bo‘lib, u Buyuk Alyaska zilzilasi deb ataladi. U Alyaskaning eng yirik shahrida, shtat markaziy qismining janubida, Kuk ko‘rfazi qirg‘og‘ida qayd etilgan edi. Zilzila o‘chog‘i 20 kilometrdan ziyod chuqurlikda, Tinch okeani plitasining Shimoliy Amerika plitasiga cho‘kish chegarasida joylashgan edi.

1964-yilgi 9,2 magnitudali zilzila Ankorij shahrini vayronaga aylantirib, sunamini chaqirgan. O‘shanda sunami Alyaska, AQShning g‘arbiy qirg‘oqlari va Gavayiga yopirilgan. Tabiiy ofat oqibatida 250 dan ortiq odam halok bo‘lgan.

Alyaska Tinch okeanining vulqonli olovli halqasida joylashgan. Alyaska yarim orolidan janubiy Kaliforniyagacha bo‘lgan butun tog‘li hudud vulqon faolligi yuqori bo‘lgan zona hisoblanadi, shuning uchun ushbu hududlar uchun zilzilalar kamyob hodisa emas.