O‘zbekistonda 2022-yil oxirigacha davlat OTMlarida o‘quv adabiyotlari elektronlashtiriladi

“Davlat oliy ta’lim muassasalarining akademik va tashkiliy-boshqaruv mustaqilligini ta’minlash bo‘yicha qo‘shimcha chora-tadbirlar to‘g‘risida”gi prezident qarori qabul qilindi. Hujjat bilan Vazirlar Mahkamasi, vazirlik (idora)larning ayrim vakolatlari ta’lim muassasalariga o‘tkazilmoqda.

Unga ko‘ra, quyidagi vakolatlar OTMlarga berilmoqda:

• chet el fuqarolarining o‘qishini xorijiy oliy ta’lim muassasalaridan respublika davlat oliy ta’lim muassasalariga ko‘chirish;
• oliy ta’lim muassasasi qabul komissiyasi raisi va mas’ul kotibini, shuningdek, oliy ta’lim muassasasi tomonidan o‘tkaziladigan imtihonlar bo‘yicha qabul komissiyasi raisi va a’zolari, imtihonlar jadvali, imtihon olinadigan fanlar dasturlari va baholash mezonlarini tasdiqlash;
• oliy, o‘rta maxsus va professional ta’lim muassasalarida ta’lim oluvchilarning amaliyotni o‘tash tartibini tasdiqlash va uni tashkil etish;
• oliy, o‘rta maxsus va professional ta’lim muassasalarida ichki tartib qoidalari, jumladan ta’lim oluvchilarning kiyim-boshiga doir talablarni belgilash.

Shuningdek, qarorga muvofiq 2022-yil yakuniga qadar barcha davlat oliy ta’lim muassasalari kutubxona fondidagi o‘quv adabiyotlarining to‘liq elektron shaklga o‘tkazilishini ta’minlanadi hamda Oliy va o‘rta maxsus ta’lim vazirligi huzurida yagona “Elektron kutubxona” platformasini ishga tushiriladi. “Elektron kutubxona” platformasini ishlab chiqish va yuritish Oliy ta’lim muassasalarini rivojlantirish jamg‘armasi mablag‘lari hisobidan amalga oshiriladi.

Vazirlik Ta’lim sifatini nazorat qilish davlat inspeksiyasi hamda tizimida oliy ta’lim muassasalari mavjud vazirlik (idora)lar bilan birgalikda:

birinchi bosqichda — 2022-yil 1-martga qadar:

• Axborot tizimining “O‘quv jarayonini boshqarish” qismini joriy qilinadi. Bunda oliy ta’lim muassasasining akademik faoliyati, xususan, talabaning davomat hisoboti, o‘zlashtirish qaydnomasi va reyting daftarchasi, shuningdek, guruh jurnali, dars va imtihon jadvallari raqamlashtiriladi;
• Axborot tizimining “Ilmiy jarayonni boshqarish” qismini joriy qilinadi. Bunda professor-o‘qituvchilarning ilmiy loyihalari, maqolalari, ilmiy-uslubiy nashrlari, ilmiy izlanuvchilar to‘g‘risidagi ma’lumotlar bazasi shakllantiriladi hamda professor-o‘qituvchilar va kafedralarning ilmiy salohiyatini baholash masalalari avtomatlashtiriladi;
• Axborot tizimining “Ma’muriy jarayonni boshqarish” qismini joriy qilinadi. Bunda oliy ta’lim muassasasining tuzilmasi, boshqaruv kadrlari, professor-o‘qituvchilar tarkibi va talabalar to‘g‘risidagi ma’lumotlarni yuritish hamda tegishli hisobotlarni tayyorlash raqamlashtiriladi;
• Axborot tizimining “Moliya-xo‘jalik faoliyatini boshqarish” qismini joriy qilinadi. Bunda to‘lov-shartnomalar elektron ko‘rinishda taqdim etiladi, stipendiya to‘lovlari to‘g‘risidagi ma’lumotlar tizim orqali amalga oshiriladi.

ikkinchi bosqichda — 2022-yil 1-mayga qadar:

• Axborot tizimining “Ta’lim sifatini nazorat qilish” qismini joriy qilinadi. Bunda ta’lim sifati bo‘yicha oliy ta’lim muassasalari ko‘rsatkichlarining ma’lumotlar bazasi shakllantiriladi va oliy ta’lim muassasalari milliy reytingini yuritish avtomatlashtiriladi hamda ta’lim sifati monitoringini masofaviy shaklda olib borish imkoniyati yaratiladi.

Avvalroq O‘zbekiston OTMlarining umumiy reytingi tuzilgani, O‘zbekistonda xorijiy oliy ta’lim tashkilotlari soni so‘nggi 3 yilda ikki barobar oshgani, mamlakatda moliyaviy mustaqil OTMlarga qo‘shimcha vakolatlar berilishi to‘g‘risida xabar berilgandi.