Rossiya va AQSh 10-yanvar kuni qurollanish nazorati hamda Ukrainadagi vaziyat bo‘yicha muzokaralar o‘tkazadi. Bu haqda AFP agentligiga tayanib, “RBK” xabar berdi.
“Qo‘shma Shtatlar Rossiya bilan hamkorlikka umid qiladi”, — degan AQSh Milliy xavfsizlik kengashi vakili.
Uning so‘zlariga ko‘ra, 12-yanvar kuni Rossiya — NATO kengashining yig‘ilishi, ertasi kuni esa Rossiya, Yevropada xavfsizlik va hamkorlik tashkiloti (YeXHT) vakillari o‘rtasida muzokaralar bo‘lib o‘tishi kutilmoqda.
Avvalroq Rossiya tashqi ishlar vaziri Sergey Lavrov Moskva Yangi yil bayramlaridan keyin Vashington bilan xavfsizlik kafolatlari bo‘yicha muzokaralarining asosiy raundini boshlashni rejalashtirayotganini ma’lum qilgandi. Rossiya tomonidan ularga vazirlar va harbiylardan iborat idoralararo delegatsiya boshchilik qiladi.
Vazirning so‘zlariga ko‘ra, Rossiya AQShga hech qanday ultimatumlarni qo‘ymaydi, biroq “oxiri yo‘q munozaralar” haqida gap bo‘lishi mumkin emas. Moskva uchun ushbu masala bo‘yicha diplomatik sa’y-harakatlar muhim, xususan, “qandaydir ma’lum muddatga”.
Dekabr o‘rtalarida Rossiya AQSh va NATOga xavfsizlik kafolatlari bo‘yicha shartnomalar loyihalarini topshirgandi. Ularda NATOning sharq tomon kengaymasligi, sobiq SSSR davlatlarining ittifoqiga qo‘shilmaslik va Ukraina hududida harbiy faoliyatni taqiqlash kabi bandlar mavjud. Bundan tashqari, Moskva Vashingtonga quruqlikdagi o‘rta va qisqa masofali raketalarni milliy hududdan tashqarida joylashtirishdan bosh tortish tamoyiliga qaytishni va yadro qurolini milliy hududdan tashqarida joylashtirishni chiqarib tashlashni taklif qilgan.
Eslatib o‘tamiz, 20-aprel kuni Zelenskiy Putinga Ukrainaning Donbassidagi urush ketayotgan istalgan joyida uchrashishni taklif qilgandi. Putin bunga javoban agar Ukraina prezidenti Donbass muammosini muhokama qilmoqchi bo‘lsa, avval u Donetsk va Lugansk Xalq Respublikalarining rahbarlari bilan uchrashishi kerakligini va shundan keyingina uchinchi tomon sifatida Rossiya rahbariyati bilan uchrashishi mumkinligini aytgan. Shuningdek, u Rossiya tomonining Ukraina bilan ikki mamlakat o‘rtasidagi munosabatlar haqida gaplashishga tayyorligini bildirgan va Zelenskiyni “o‘ziga qulay bo‘lgan istalgan vaqtda” Moskvaga kelishga taklif qilgan.
Izoh (0)